الثورة اللى فاتت - مقال كلاود
 إدعم  المنصة   
makalcloud
تسجيل الدخول

الثورة اللى فاتت

لهواة الكلام فى السياسة وكدا

  نشر في 07 أكتوبر 2014 .

الناس اللى لازالت بتتكلم عن حراك ثورى وثورة مستمرة وكلام من اللى كدهون .. تعالوا نتكلم بمنطق السرد شوية..

1. كان فى شوية شباب نزلوا التحرير والأمن نفخهم كالمعتاد

2. نزلت التيارات السياسية فى ثورة معاهم واتعمل ميدان

3. فى حين ان كل اللى فوق 50 سنة ولعب سياسة فى البلد يعرف ان الجيش بيحكم وان ضباط كامب ديفيد لسه فى الصورة محدش اتكلم وساب الناس تقول يسقط يسقط (النظام يعنى مبارك)

4. وطلع النداء (الأحمق .. هو كان فى لفظ تانى بس حفاظاً على مشاعر الجماهير) ينادى بسلمية سلمية والجيش والشعب ايد واحدة وينزل الجيش بدباباته يحمى الميدان ليتحضر للانقلاب على رأس السلطة البارز ويمسك زمام الحكم

5. وهبا ، مبارك سلم السلطة بس مش للشعب .. سلمها للمكان اللى أخدها منه (المجلس العسكرى) وبالتالى دا اعلان ان البلد لازالت تحكم حكم النظام الحاكم تحت اسم مستعار (الفترة الانتقالية) .. بس للأسف اللى عارفين كدا ودارسين فساد الجيش ودايقينه من زمان وعارفين شبكة علاقاته مطلعوش يقولوا للناس كدا عالملأ .. اللهم الا (الاستاذ حازم فك الله أسره)

6. تجرى المفاوضات حول تفاهات على شاكلة [ الدستور ولا الانتخابات ، نيابية ولا رئاسية ، مين جاهز للترشح .. قال يعنى كان فى حد هيكسب ] وتظهر كلمة مبارك تتردد فى الآفاق "خليهم يتسلوا" ..

7. وفعلاً بدأ كل اللى يقف فى وش النظام الحقيقى يتقتل بكل دموية ووحشية وبلا تردد او حتى محاسبة تحت مسمى (تعطيل المسار الاصلاحى وتمديد الفترة الانتقالية) وتحصل محمد محمود ومجلس الوزراء والخ الخ الخ الخ … بمباركة العديد من القوى الثورية واعتراض البعض (بس مش عاوز يقول انه بيعترض عشان الحال ميقفش .. قال يعنى هو كان بياخد خطوات عملية لبناء الوطن) ..

8. انتخابات فى قوانين وحل وربط ودستورية وقضاء مقدس لا تناقش احكامه لحد ما جات لحظة الحسم وعصر العاصرون ليمونهم وانتخبوا مرسى .. هنا لا أخفيكم سراً بدأ الجيش (النظام) يتوغوش ويسرع من وتيرة افشال الثورة ويخليها علنية اكتر وتظهر القنوات الاعلامية من ناحية والحركات الممولة من ناحية (أيوا كان فى حركات ممولة من الجيش وباعترافه ، رغم وجود ثوار حقيقيين كانوا معترضين على حاجات منطقية زى ايقاف المسار الثورى (قال يعنى كان فيه مسار) .. ومداهنة العسكر والحكم تحت براشوط المجلس العسكرى والاعلان الدستورى المقيد لصلاحيات الرئيس .. ) وطبعاً محدش يقدر يتكلم بما ان الجيش هو الحصن الأخير وان جند مصر شامخ وهو من خير أجناد الأرض ..

9. تحصل كام حاجة فى الاستخبص كدا وتظهر المواجهات الحقيقية بين مرسى وانصاره من الاسلاميين عموماً وبين الطرف التانى من الثوار مدعومين بالممولين والمجلس العسكرى .. وتحصل حوادث الجنود ويتنحى طنطاوى لتأتى الشخصية الأعوص(السيسى) غصب عن التخين .. وتبدأ الدنيا تولع من ساعته ونوصل الاتحادية وتوابعها ..

10. فى السكة نوصل الى شيطنة مرسى ونظامه وشيطنة الاسلاميين والحمد لله باسم يوسف قام بالواجب - ولو من غير قصد حتى عشان اللى هيبرروا - بالاضافة الى اخطاء مرسى بسبب عدم خلو الساحة من الالاعيب والصوابع من ناحية ، وامتناع الاجهزة عن معاونته من ناحية (قال يعنى الاجهزة مكانتش معلنة ان رئيسهم المشير او الفريق فيما بعد وان مبارك أب روحى وحبيب بيه العادلى مثال فى الجدية والانضباط وبيدلوا تحية عسكرية على شاشات التلفزيون)

11. تكمل المسرحية بالاسلوب القضائى (وتتفحت كل الأهداف الثورية) تحت مظلة ان القضاء شامخ وبكدا .. بقى عندنا والحمد لله قضاء شامخ + جيش خير اجناد الأرض شامخ + اعلام حر شامخ + شوية اسلاميين عاوزين يلبسونا حجاب مش كفاية الضلمة ..

12. ويحصل الانقلاب العسكرى (رغم انهم حاولوا يعملوه ثورة زى اللى فاتت وان الجيش انحاز للشعب وبتاع بس معرفوش ووكالات الانباء والمحللين السياسيين فضحوهم) وتبدأ سكة الدم اللامنطقية تظهر اكتر كل كام يوم من 200 الى 300 شهيد بالفعل لحد ما يوصولوا الى فض الاعتصامات واحراق من فيها أحياءاً ..

13. مسك سلاح وعمره وضرب رصاص .. يبقى خلاص مفيش فايدة انك تقوله سلمية وتفتح صدرك له ودا واضح جداً فى صور الشهداء السلميين وصور القتلة المسلحين من أول جامعة الازهر والمدينة ورمسيس والفتح وكل محافظة بعد كدا ..

14. فضلنا عالحال دا كتير لحد ما الناس بقيت تعتبر المظاهرات شئ عادى ووصلنا مرحلة الملل نسبياً لكن كانت التظاهرات ماشية وشغالة وفى نفس الوقت خارطة الطريقة ماشية وشغالة والسيسى من فريق لمشير لرئيس وعما قريب هيعملوه رئيس مراجيح المولد بس مش قضيتى .. وبمجرد انتخاب السيسى أقدر أقولكم ان الثورة المضادة نجحت فعلياً وحرفياً بتحالف عربى (خليجى) صهيونى مشترك وقشطة كدا

15. الفكرة الأخطر اننا دخلنا فى مرحلة الرومانسية الثورية ومش حاسين كل ما تتجدد ذكرى او تاريخ تحصل مظاهرات يموت عشرات او اقل او اكتر ويعتقل اضعافهم مرتين تلاتة او اكتر وبس وما بين ذلك الناس راضية ومطنشة وساكتة وأغلب الشباب (اللى شايف بكره صح) بيدور على فرصة للهجرة مش للسفر وبس ..خطورة الرومانسية الثورية فى انها مرحلة ملهاش قيادة حكيمة رشيدة تقول للناس ارجعوا بيوتكم يا خلق يا هو احنا خسرنا الحرب ، بالعكس الناس بتروح تركيا وتقول انزلوا كملوا الثورة هى فين الثورة يا جدعان ..

16. الوضع الحاصل دا هيستمر بالكتير سنة والناس هتتعب وتخلص مرحلة الرومانسية الثورية وبعدها هتظهر موجة من الافراجات عن الشباب المعتقلين (أظن انها بدأت وارجوا الله انها تكتمل) والناس الكبيرة (منصباً) فى الغالب هتطول قد 5 سنوات كدا ولا حاجة وغالباً هتتلغى الاعدامات (أرجوا ذلك) .. ويرجع الناس فى مصر الى عهد المماليك ، بحكم عسكرى صرف .. وعشان كدا شفيق كان بيقول كلام حكم والله بيقول (انا جاى اهدى عليكم حدة الحكم العسكرى بشخصية مدنية عسكرية مشتركة) احنا اسفين يا جنرال .. دا غير عمر سليمان اللى خدها من قاصرها ومات وارتاح وحلف طلاق تلاتة ميقعد فى الدينا لحظة واحدة (فى الغالب السيسى منفسن منه وهو عارف اللى هيحصل فقالك اطلع بكرامتى واحنا من موقفنا دا بنقوله ارجع يا جنرال) .. وهكذا ..

17. حزب النور بما اننا بنتكلم عن الثورة .. الخطأ الوحيد اللى وقع فيه حزب النور - دا على فرض ان قيادات الحزب ليسوا عملاء لأمن الدولة قال يعنى أغلبهم مش كدا !! - الخطأ انهم مش سكتوا وريحوا دماغهم وحلوا الحزب وقالوا السياسة حرام بما ان مفيش منافسة ، ولا اتهدوا وقالوا الزموا بيوتكم واتقوا الفتنة .. لا طلعوا بيانات متفقة بشكل كبير مع اهواء العسكر وان الثورة خراب والثوار مأجورين وبدأت التبريرات للعسكر (اللى كان الناس زمان بيلوموا الاخوان عليها) تبقى بشكل مبالغ فيه لدرجة مقززة .. وعلى الاحتمال التانى اللى بيلقى قبول أوسع عند اغلب الناس حزب النور كان جزء من المكيدة وذراع اصيل لأمن الدولة العميقة عشان يبينوا ان حتى المتشديين ضد الاخوان ..

18. مين بقى اللى نفذ الخطة بت البولغة دى .. اطراف دولية (الصوابع) اسرائيل رأس الحربة ، السعودية ، الامارات ، الكويت ، أمريكا بدعم تخطيطى ومادى لا اكثر لكنى استبعد انها تكون طرف فى طبلية الانقلاب الدولية ، أطراف داخلية (الاتنين تلاتة فى الحارة المزنوقة) .. مخابرات بكل انواعها خاصة الحربية ، امن دولة وكل اذرعتها ، باقى اجهزة الشرطة ، الحركات الممولة ، الازهر ، الكنيسة ، الاحزاب اللى كانت بتنافس الاخوان من اول ابوالفتوح وحمدين من اليسار لحد حزب النور من اليمين .. أما 6 ابريل فبصراحة كانت بتشجع اللعبة الحلوة ساعات وساعات .. يعنى يومين تلاتة ثورة يومين تلاتة بلاش وهكذا ..

السؤال بقى هو ايه اللى كان المفروض يحصل من الأول ؟

ولا حاجة عدم النزول فى 25 يناير أصلاً وكان العيال اللى فى التحرير اخدوا العلقة بتاعت كل مرة والدنيا خلصت لان الميدان متفتحتش وبقى ميدان الا بنزول الاسلاميين ودا واقع فعلي ..

طيب ليه ماكنا نعمل ثورة صح ؟

ثورة صح يعنى تطلع تنتزع النظام وتهده من جذوره وتبنيه يعنى سلاح م أول يوم وعلى كل مؤسسة فاسدة تقطع كل رقبة فيها اما الثورة الضاحكة اللى حصلت دى كانت عك (لا ثورة بلا أنياب) ثم تعالى قولى هنا .. ثورة ايه وانت بتطالب النظام الفاسد انه يتنحى طيب هيتنحى ويسلم السلطة لمين فى وجهة نظر حضرتك يعنى ؟ اكيد لحد فاسد تانى (بالمناسبة اللى هسمعه بيقول الشعب يريد اسقاط النظام تانى هو الحر مين هيسقطهولك يا حبيب عين مامته !!)

طيب والحل دلوقتى ؟

والله حضرتك احنا اتحشرنا حشرة زى الزفت ، اللى بيحكم خانق خنقة طين ومعاه كل انواع السلاح متاحة ضدك ، وتسليح الشعب اللى بينزل المظاهرات قصة خرافية حتى عالاقل من الناحية المادية والمعنوية (احنا شعب ميكى م الاخر) دلوقتى المفروض ان فى حد من الاخوان موجود برا السجن يقترح الصلح عالسيسى والدية للشهداء والافراج للمعتقلين وكل واحد يرجع مطرحه فى مقابل ان مفيش مظاهرات وان الاسلاميين ياخدوا كام وزارة من الوزارات اللى متعلقة بحال الشعب (التموين والكهربا وامثالها) هم بيعرفوا يعملوا دا كويس والعلاقات الخارجية والوزارات السيادية محفوظة لولاد الأنثى (السيسى وأعوانه) .. وبكدا يادار مدخلك شر وبالمرة يفك الحصار عن غزة مقابل ميناء بحرى ومطار جوى فى مقابل وقف اطلاق نار وهدنة طويلة مع الكيان الصهيونى ..

وافقوا كان بها ، موافقوش يبقى افتكر مصر كمان 8 سنوات ولا حاجة او 7 على ما التحالف الاقليمى يتحل بشكل او بآخر (انا معرفوش بس مستحيل تحالف قذر زى دا يستمر) ، والجيش من جوا يحصل فى حاجة تطلع لنا فاسد تانى نعرف نتفاهم معاه بعد ما يفسحوا السيسى ان شاء الله لما البلد ترسى .. واظن الجيش هيعملها بس مين فى الجيش ناوى على كدا ؟؟ مش عارف بصراحة

تنبيه :

دى وجهة نظرى ولا تعبر عن أى انحرافات فكرية او غير فكرية ، القضية ان لازم حد يوقف اللى بيحصل للشباب كل يوم بلا هدف



   نشر في 07 أكتوبر 2014 .

التعليقات


لطرح إستفساراتكم و إقتراحاتكم و متابعة الجديد ... !

مقالات شيقة ننصح بقراءتها !



مقالات مرتبطة بنفس القسم

















عدم إظهارها مجدداً

منصة مقال كلاود هي المكان الأفضل لكتابة مقالات في مختلف المجالات بطريقة جديدة كليا و بالمجان.

 الإحصائيات

تخول منصة مقال كلاود للكاتب الحصول على جميع الإحصائيات المتعلقة بمقاله بالإضافة إلى مصادر الزيارات .

 الكتاب

تخول لك المنصة تنقيح أفكارك و تطويرأسلوبك من خلال مناقشة كتاباتك مع أفضل الكُتاب و تقييم مقالك.

 بيئة العمل

يمكنك كتابة مقالك من مختلف الأجهزة سواء المحمولة أو المكتبية من خلال محرر المنصة

   

مسجل

إذا كنت مسجل يمكنك الدخول من هنا

غير مسجل

يمكنك البدء بكتابة مقالك الأول

لتبق مطلعا على الجديد تابعنا