انعزال - مقال كلاود
 إدعم  المنصة   
makalcloud
تسجيل الدخول

انعزال

أمــل ممدوح

  نشر في 14 ديسمبر 2016  وآخر تعديل بتاريخ 25 يناير 2017 .


لأني إنسان أنا هانعزل .. 

زي الصدف ما بيحمي سره من الانجراف

ويدفّي بقَفلته برد العجاف..

وبيحضن كيانه ويحتويه من إيد لعين .. 

من صوت لعين .. بيفتت الروح وبيحيلها لأنين

وفي عالم الجلد التخين 

بيحط سور علشان ميقدر يكتمل ويكون جنين

بيشيل سنينه ويرتحل فوق رمل..موج .. ملوش مكان ..

 لكن مكانه فين ما بيحط الأمان ..

ويكتمل بالاختفا .. بالانعزال .. 

المهم يبقى له كيان زي ما يكون الكيان

كيان يعلّم على روح الوجود ..

 لو جوّه صدفة مقفّلة هيكون له صوت

مش زي طلقة صخب شايلة فراغ ..مليانة موت ..

من وطأة البرد اللعين هروح لجوه الكون سنين ..

نَسّوني بره إني جنين ..

كل الحاجات قالعة الحاجات ..

والجاي ملهوش ذكريات..

والشجر عند السقايا والقمر بيحطوا عليه الحاجات ..

والناي عند البحيرة بيرقصوله بالصاجات..

و شمسهم بتستحمى وسطهم من غير حاجات ..

وهما يجروا يصقفوا .. ويصوروا ويرقصوا 

أفواه بتزيد اتساع وسط الموات..

كل الطروف فينا بتتحرق قبل الأوان

من غير ما نحبي صغيرين نجري  نتحول كبار    

كل ما فينا عدد ملهوف يبقى في الحساب

كل حاجة بتتحرق والتلج قدام كل باب 

أنا عايزة أكون حقيقة.. وروح بهدوم جديدة ..

مش أغني للشياكة وهدومي مبقعين

واتغزّل في القذارة واتسلطن بالديدان

وتتخرم وداني وأقول كمان كمان

 لو روحي يا سمين إزاي أرويها طين ؟؟

بسُكوت مليان ونس ؟

أو صوت يشرَّخ في الحجر ويخنق النبت الجنين ..

صوت مليان ضجر .. مليان طنين ؟

لإني إنسان أنا هانعزل .. 

زي الصدف ما بيحمي سره من الانجراف

ويدفّي بقفلته برد العجاف

وبيحضن كيانه ويحتويه من إيد لعين ..

 من صوت لعين ..

بيفتت الروح وبيحيلها لأنين..

مش عايزة أدوب أو أتعجن جوّه بدن ..

بيصيد في أنفاس الطيور

ويضَيَّق السما من الرحَب 

وبخوره من ريحة القبور

لأني إنسان أنا هانعزل .. 

علشان أكون ..







   نشر في 14 ديسمبر 2016  وآخر تعديل بتاريخ 25 يناير 2017 .

التعليقات


لطرح إستفساراتكم و إقتراحاتكم و متابعة الجديد ... !

مقالات شيقة ننصح بقراءتها !



مقالات مرتبطة بنفس القسم

















عدم إظهارها مجدداً

منصة مقال كلاود هي المكان الأفضل لكتابة مقالات في مختلف المجالات بطريقة جديدة كليا و بالمجان.

 الإحصائيات

تخول منصة مقال كلاود للكاتب الحصول على جميع الإحصائيات المتعلقة بمقاله بالإضافة إلى مصادر الزيارات .

 الكتاب

تخول لك المنصة تنقيح أفكارك و تطويرأسلوبك من خلال مناقشة كتاباتك مع أفضل الكُتاب و تقييم مقالك.

 بيئة العمل

يمكنك كتابة مقالك من مختلف الأجهزة سواء المحمولة أو المكتبية من خلال محرر المنصة

   

مسجل

إذا كنت مسجل يمكنك الدخول من هنا

غير مسجل

يمكنك البدء بكتابة مقالك الأول

لتبق مطلعا على الجديد تابعنا