زيارة عائلية والعياذ بالله - مقال كلاود
 إدعم  المنصة   
makalcloud
تسجيل الدخول

زيارة عائلية والعياذ بالله

  نشر في 01 أبريل 2017 .


قد ايه الزيارات العائليه دي شئ جميل ولذيذ..مش ممكن علي جو الالفه والمودة والمحبه اللي بيبقوا منتشرين في المكان وقت الزيارات العائليه دي , ضحكه الناس في وش بعض ساعه الزيارة بتبقي جميله وهاديه كدة وكلها مودة ومحبه كدة.....هو اينعم الضحكه دي بتبقي في الغالب مصطنعه عشان غالبا هيبقي في مشاكل بين عيلتين, وغالبا المشاكل دي هتبقي بسبب ان خالتك رافضه رفض قاطع انها تقبض امك اسم بدري في الجمعيه , بس برضوا... محبه ومودة مش هتلاقيهم في اي بيت في العالم , يعني انت مثلا لو طلعت فرنساوي ولا الماني كنت عمرك هتلاقي جو الالفه والمحبه دة منتشر هناك , عمرك مثلا كنت هتسمع ان خالتك الفرنساويه كانت هترفض تقبض امك الفرنساويه برضوا اسم بدري في الجمعيه ؟ عمرك كنت هتعيش جو الساسبينسس والاثارة والتشويق دة ؟ طبعا لا .

والحقيقه بقي ان مهما اختلفت الطبقات الاجتماعيه للمصريين هتكتشف ان الزيارات العائليه واحدة في كل بيت في مصر , من اول المليونير اللي بيعزم اهله علي زيارة في بيته تكلفتها اكتر من مليون جنيه.... لحد اقل موظف شغال في القطاع العام ومرتبه ميتعداش الالفين جنيه شهريا وهتلاقيه عامل عزومه لاهله بأكتر من مليون جنيه برضوا...متفهمش ازاي

والمهم ان الزيارات العائليه اللي بتبان بسيطه دي هي في الحقيقه اعمق بكتيرررر مما تتخيل , وخفايا الزيارات دي اكتر بكتير من علنها....يعني علي سبيل المثال وليس الحصرهتلاقي امك بتضحك في وش خالتك بإبتسامه عريضه ملهاش اول من اخر وهي بتقول في نفسها بنفس اداء الاستاذ احمد عبد العزيز في مسلسل سوق العصر : لو فاكرة انك هزمتيني بطبق المحشي اللي عملتيه في الزيارة اللي فاتت فانتي تبقي بتحلمي , انا هقتلك بصينيه المكرونه بالشاميل بتاعتي انهاردة (هي طبعا هتقتلها معنويا مش حرفيا يعني)

تقوم خالتك باصلها وضاحكه ضحكه شريرة متقطعه بنفس اداء الاستاذ احمد خليل في مسلسل مش فاكر اسمه الصراحه وتروح قايله في نفسها برضوا : ها لسه برضوا ناويه تدخلي معايا في منافسه تاني ولا خلاص , ان الاوان بقي تعترفي وتقتنعي ان نفسي في الاكل لا يعلي عليه , ويروحوا مسلمين علي بعض وداخلين الشقه عادي ولا كان في حاجة . او تلاقي ابوك مثلا بيسلم علي عمك بكل حفاوة وسرور مع انهم كانوا قاعدين مع بعض من نص ساعه علي القهوة .

المهم يعني ان دي كانت استهلالاله صغيرة كدة عشان اتكلم عن زيارتنا العائليه لقريبنا اللي لسه جاي من الكويت المهم اني قررت اعصر علي نفسي لمونه واروح الزيارة التقيله علي قلبي دي يمكن ينوبني من الحب جانب او يكون جايبلي هديه عليها القيمه ولا حاجه (انا مش استغلالي لا ) ,

في بدايه الزيارة طبعا وقبل الخالات والعمات ما يحضروا الغدا تبدأ فترة توزيع الهدايا وطبعا زي ما احنا عارفين ان الخليج يعني رز ورز يعني فلوس (بالكويتي) فالطبيعي ان المفروض تبقي الهدايا قيمه , وده الحقيقه اللي عمره ما حصل...هتلاقيها شويه هدايا عبارة عن بدل بتبقي زوقها حقير وواسعه ومبهوقه من الجناب وتحسها جايه من بورسعيد مش من الكويت ابدا علي شويه برفانات خليجي من اللي بتوجع البطن دي علي شويه كور كفر مش منفوخه للعيال , ويوم ما هيحاول يطور من نفسه ويحاول يجيب هديه عليها القيمه هتلاقيه جايبلك مثلا بدله غوص بالزعانف او تيشيرت بنفيكا الاصلي , وهتلاقيه في الزيارة اللي بعدها زعلان عشان مجيتلوش لابس هديته...اللي هو انت ليه يا حبيبي مجتليش بتيشرت بنفيكا اللي جايبهولك السنه اللي فاتت , او ليه يا حبيبي مجتليش ببدله الغوص اللي جبتهالك بالشئ الفلاني (ايه الشئ الفلاني دة) المهم انه اي تأنيب ضمير وخلاص .

وبعد توزيع الهدايا بالمناسبه وانا هديتي كانت زي ما توقعت بالظبط (بدله غوص بالزعانف ) جاء الخبر الحزين من المطبخ وهو ان الاكل لسه فاضل عليه شويه , والحقيقه ان الخبر نزل علينا كالصاعقه او عليا انا بالذات ,هو مش جوع قد مهو انا نفسي اخلص وامشي بقي... وبعد ما سمعنا الخبر المشئوم بتاع تأخر الغدا قرر قريبنا اللي جاي من الكويت وبكل وقاحه انه يفاجئنا بضربه استباقيه غير معمول حسابها علي الاطلاق وقرر انه يفرجنا علي قناه كويتيه بمذيع كويتي بحجه انهم مبيقلبوش القناه دي هناك (هما مبيقلبوهاش هناك , احنا مالنا ! ).....فتخيل معايا كدة المشهد

زياره عائليه , وقناه كويتيه , ومذيع كويتي اللي هو حاجه في منتهي الاستغفر الله العظيم يعني .قررت افوض امري لربنا واتابع المذيع الكويتي دة بيقول ايه يمكن نطلعلنا بحاجه مفيدة من ام الزيارة دي , وبالصدفه البحته المذيع الكويتي دة كان بيتكلم عن خطورة المد الشيعي ! وزي ما احنا عارفين خطوره المد الشعي علينا احنا كعرب.....خصوصا في فصل الشتا !!!! (ايه اللي انا بقوله دة) , المذيع المغمور بلغته الغريبه دي شايف ان المد الشيعي اخطر علينا من المد الامريكي ولا المد الصهيويني , مفكرش مثلا يتكلم عن ضرورة حل المشكله السوريه او اليمنيه او الليبيه او حل القضيه الفلسطينيه , لكن طبعا هو مش هيتكلم..عشان محدش بيتفرج علي مذيعين كويتين اساسا ولا حد مهتم يعرف رأيهم .

جائنا الخبر السعيد والغدا جهز الحمد لله واخير واخيرا هنطفي التليفزيون وهعوض دمي اللي اتحرق دة بشويه بروتينات زالفل , خلص الغدا وللاسف لسه بدري علي الرحيل وقريبنا دة ومش هيسيبنا نمشي واحنا عارفينه غلس وبيمسك في الضيوف باديه وسنانه لدرجه انه في مرة قام جري قفل الباب بالمفتاح عشان نطول في الزيارة "بحجه هو انا بشوفكوا كل يوم" وقررت اعصر علي نفسي لمونه لتاني مرة واكمل الزيارة لحد اخرها , والمرة دي مش طمعا في هديه قد ما هو طمعا في ان جارتهم الحوة تطلع تعد معانا زي ما بتعمل كل مرة والحقيقه ان مطلعتش انا لوحدي اللي مستنيها , دة طلع كل رجاله العيله مستنينها واثناء فترة انتظار جارتهم المعهودة تطرق كبارات العيله للحديث عن احوال البلد وازاي البلد دي ماشيه ببركه ربنا "الا صحيح هي ازاي البلد دي ماشيه ببركه ربنا رغم كل اللي بيحصل فيها دة" واثناء احتسائهم لاكواب الشاي اللي من غير سكر وانا الصراحه مش فاهم ازاي الانسان ممكن يشرب شاي من غير سكر قاموا بالحديث عن نظريه المؤامرة اللي بتحوم حول بلدنا العزيزة "مصر" وتطرق نساء العيله بمقاطعتهم في الحين والاخر بالدعاء علي امريكا وبريطانيا , الحقيقه انا مش عارف اشمعنا بريطانيا بس مدام ستات العيله بتدعي عليهم يبقي بريطانيا بتتأمر علي مصر .

قطع الحديث الشيق دة قريبنا الغتت بسؤاله الحقير بتاع : بما انك من العياال ******ط بتوع الفيصبوك وطنيطر ايه رأيك في موضوع المؤامرة دة ؟ والحقيقه ان انا لا سني ولا لياقتي البدنيه تستحمل ان اخش في نقاش جدلي مع كبرات العيله في موضوع زي دة , فقررت اهرب من الموضوع باي افيه سخيف عشان يضحكوا وينسوا السؤال دة , وفعلا نجحت خطتي الجهنميه ( هو يعني ايه جهنميه) في اني اهرب من الموضوع ونسيوا السؤال وكله تمام الحمد لله .

بس الحقيقه ان سؤال قريبنا الغتت كان سؤال في منتهي الاهميه , الا صحيح هو انا ايه رأيي في موضوع المؤامرة دة ؟ هو انا ماليش رأي ؟ لا طبعا انا مصري والمصري لازم يكون ليه رأي في كل حاجه حتي لو مش فاهم الحاجه دي....بس يبقي السؤال : هو اشمعنا احنا يعني اللي كل دول العالم بتتأمر علينا ؟

- يمكن عشان موقعنا الجغرافي مثلا ؟

- بس لا....عندنا دوله زي المغرب مثلا عندها موقع جغرافي رومانسي ولذيذ وعمرنا ما سمعنا عن المؤامرة الصهيوالامريكيه اللي بتحوم حوالين المملكه المغربيه الشقيقه .

يعني كدة الموقع الجغرافي مطلعش السبب الرئيسي للمؤامرات اللي يتحوم حوالين مصرنا الحبيبه , ثم ان فكرة المؤامرة علي الدوله بسبب موقعها الجغرافي دي شبه اتلغت من تالته اعداي مثلا.

الموضوع فعلا محير....هما هيتأمروا علينا علي ايه يا حسرة

يعني هل مثلا بيتأمروا علينا عشان يسرقوا مننا شبكه الكهربا الموفرة للطاقه...اوعنيهم علي شبكة الصرف الصحي الجبارة , او ممكن يكونوا عاوزين يسرقوا مننا اسرار وعجائب الصناعات الحربيه المتطورة...او سر النقاء والصفاء والرخاء اللي بيشعر بيه المواطنين اثناء شربهم من مياه النيل والعياذ بالله , او مثلا ممكن يكونوا عاوزين يسرقوا فكرة جودة التعليم العاليه في مصر وكيفيه حشر 200 طالب جوه فصل واحد مساحته متر في متر وربع , طب هل مثلا ممكن يكونوا بيتأمروا علينا عشان يخترقوا وزارة الداخليه لمعرفه سبب ريادتنا في مجال حقوق الانسان , وطبعا بما انهم اخترقوا وزارة الداخيله فأكيد هيحاولوا يسرقوا مننا النظام المروري العالمي وخاصه خريطه تفصيل الدائري وشارع فيصل , او مثلا ممكن تكون بريطانيا بتتأمر علينا عشان تسرق مننا كيفيه ادارة منظومه الصحه العاليه جدا, وبرضوا ممكن يكون العالم كله بيتأمر علينا عشان يسرقوا مننا اللاختراعات الجبارة خصوصا الجهاز اللي بيحول الايدز لكفته (الا هو فين الجهاز دة صحيح ؟) ,لا داهيه يكون عنيهم علي عبعاطي !

بس يبقي السؤال : هي ليه الناس دي مؤمنه بنظريه المؤامرة اوي كدة ؟؟ والحقيقه بعد بحث دام لاكتر من شهرين عن ليه الناس بتحب تؤمن بنظريه المؤامرة , ملقيتش غير اجابه واحدة مُقنعه عند عالم اسمه روب بروذرتون مؤلف كتاب "عقول مريبه" اللي بيتكلم فيه عن سيكولوجيه المؤامرة , وفي الكتاب اتكلم عن ليه الناس دايما بتحب تصدق نظريه المؤامرة ؟

لانهم ببساطه حابين يشوفوا العالم زي ما هما متعودين يشوفوا الخير ضد الشر يعني الشر يفضل يبهدل في الخير طول الفيلم وفي الاخر الخير ينتصر , فلما هيتكلموا عن نظريه المؤامرة العقل بيقول انهم هيعرفوا مين الناس اللي بتتأمر عليهم دول وأول ما يتكشف عنهم هيحاربوهم وهينتصروا في الاخر وهننزل بالتتر وهنفرح كلنا .



  • Karim Nour
    ممنوع الاقتراب او التصوير ~~
   نشر في 01 أبريل 2017 .

التعليقات


لطرح إستفساراتكم و إقتراحاتكم و متابعة الجديد ... !

مقالات شيقة ننصح بقراءتها !



مقالات مرتبطة بنفس القسم

















عدم إظهارها مجدداً

منصة مقال كلاود هي المكان الأفضل لكتابة مقالات في مختلف المجالات بطريقة جديدة كليا و بالمجان.

 الإحصائيات

تخول منصة مقال كلاود للكاتب الحصول على جميع الإحصائيات المتعلقة بمقاله بالإضافة إلى مصادر الزيارات .

 الكتاب

تخول لك المنصة تنقيح أفكارك و تطويرأسلوبك من خلال مناقشة كتاباتك مع أفضل الكُتاب و تقييم مقالك.

 بيئة العمل

يمكنك كتابة مقالك من مختلف الأجهزة سواء المحمولة أو المكتبية من خلال محرر المنصة

   

مسجل

إذا كنت مسجل يمكنك الدخول من هنا

غير مسجل

يمكنك البدء بكتابة مقالك الأول

لتبق مطلعا على الجديد تابعنا