دوبلير في الخير - مقال كلاود
 إدعم  المنصة   
makalcloud
تسجيل الدخول

دوبلير في الخير

  نشر في 09 ديسمبر 2015  وآخر تعديل بتاريخ 08 يناير 2016 .

محدش فينا ليه الاحقية انه يقيم حد سواء كلامه او تصرفاته محدش فينا ليه الحق انه يحكم علي حد اساسا ولكن في حاجات كدة لازم نتكلم عليها والا هنتخنق نسميها حكم نسميها انتقاد نسميها زي مانسميها المهم اننا نتكلم عليها الحاجة اللي هنتكلم عليها دي انتشرت مؤخرا جدا علي الشاشات سواء برامج او اعلانات  الحاجة دي بتسمي ببرامج واعلانات الخير .

طبعا اسم جميل واسم عمرك ماهتلاقي حد يختلف عليه مين مجنون يعني هيضايق من الخير بغض النظر عن اي حاجة جميل انك تعمل خير جميل انك تساعد الناس جميل انك تأدي رسالتك العظيمة والسامية اللي هي مساعدة الناس زي ماربنا بيطلب مننا دايما.بس اكيد مش جميل انك تذل الناس اللي بتساعدهم وتشردهم ع التلفزيون وتتاجر بهمومهم وتذلهم قدام قرايبهم ومعارفهم مقابل فلوس ولا دواء ولاشقة.وياريتك بتكتفي بكدة دانت طالع تشحت لهم بطريقة رخيصة ومبتذلة وبعدين  لو هنتكلم في الاول علي برامج الخير بالتحديد لازم مع عرض الحالات سواء ست فقيرة محتاجة فلوس ولاراجل معاق محتاج طرف صناعي ولاطفل صغير عنده ثقب في القلب لازم تلاقي موسيقي فيلم الفرح في  الخلفية وكأننا فعلا بنتفرج علي فيلم ابطاله ناس غلابة ملهمش ذنب في الظروف اللي هما فيها ذنبهم الوحيد انهم معهمش فلوس ولا امكانيات كافية للمعيشة الادمية.

المشكلة في بعض الاحيان ان البرنامج مثلا بيروح للحالات ويذل اللي خلفوهم كالعادة ويقولهم هنعرض حالتكم في البرنامج والناس هتتبرعلكوا وللاسف في حالات كتير محدش بيتبرعلها وبيبقي البرنامج راح ذلهم ببلاش وخد من وراهم فلوس مشاهدة واعلانات .منقدرش نلوم الناس اللي متبرعتش علي انها متبرعتش لانهم من كتر ما البرنامج بيعرض حالات كل واحدة اصعب من التانية بتحصل عملية مقارنة مابين الصعب والاصعب واللي محتاج واللي محتاج اوي وكأن البرامج بيعرض سلع معينة وعلينا نختار.

زمان واحيانا دلوقتي برامج المسابقات اللي بيخبطوا ع البيوت ويتفقوا مع الناس انهم اول اما الكاميرا تشتغل يعملوا نفسهم متفجأين وكدة.واللي بيفتح باب الشقة بيكون مستحمي واخر شياكة ولوست بتبقي حاطة مكياج كامل والسؤال يتسألهم ويجاوبوا عليه بكل سهولة وكل تمثيل علي انهم مش عارفين انهم هيكسبوا واول اما يأخدوا الفلوس او الجنيه الدهب يزغرطوا ويقولوا اريال اريال.اهو الهبل دا بالنسبالي احسن مليون مرة من البرامج اللي بتسمي ببرامج الخير لأن برامج المسابقات الهبلة دي علي الاقل مجرحتش الناس قدام الكاميرا دي بالعكس كسبتهم.أنما التانية الناس بيتزلوا طول الحلقة وياريتهم بيأخدوا مساعدة من البرنامج بعد الذل دا.

دي برامج الخير نيجي لاعلانات الخير دي لاتقل قذارة ورياء عن الاولي نفس الادوات برضو ونفس الكميات من الكذب والمتاجرة بالمرض والفقر .الاعلانات دي لازم تبقي منتشرة في رمضان لان رمضان شهر الخير وكدة.زي بعض الجمعيات الخيرية اللي فعلا بيقدموا مساعدات للناس بقي لازم يبقي الاعلان كدة سامي مكنش بيسمع ورسالة كتر الف خيرها خليته يسمع وساعات يجيبوا اطفال صغيرة تقول انا هعيد مع صحابي بي اللبس اللي جبتهولي رسالة .ينفع كدة ؟ بدل مالطفل يبقي فرحان بالهدوم يبقي مهموم وهو بيلعب مع صحابه عشان شافوه امبارح بيشحت في التلفزيون .ولا الاطفال المصابين بمرض السرطان لازم برضو مستشفي 57 توجب معاهم ويتاجروا بيهم مكفهومش اللي هما فيه لادول يزودوا الامهم بنشر مرضهم علي التلفزيون بكل حقارة .

تعالوا نعمل مشهد تخيلي للي بيحصل كدة خلف كواليس الاعلانات دي المخرج بيجي للطفل يقولوا اول اما اقول اكشن تقول جملة انا نفسي اعيش ماشي انا نفسي اعيش سهلة اوكية يلا جاهز اكشااااااااان الطفل يقول الجملة المخرج يتعصب ستووووب يابني بضعف اكتر من كدة باستكانة اكتر كدة الناس مش هيتعاطفوا معاك ولا هيدوك فلوس يالا اكشااااااان. في الاخر مفيش ابلغ من الكلمة دي للرد علي الحقارة والقذارة دي يقول الله في حديث قدسي (انا اغني الشركاء عن الشرك من عمل عملا اشرك معي فيه غيري تركته وشركه) يلا باي .



   نشر في 09 ديسمبر 2015  وآخر تعديل بتاريخ 08 يناير 2016 .

التعليقات


لطرح إستفساراتكم و إقتراحاتكم و متابعة الجديد ... !

مقالات شيقة ننصح بقراءتها !



مقالات مرتبطة بنفس القسم

















عدم إظهارها مجدداً

منصة مقال كلاود هي المكان الأفضل لكتابة مقالات في مختلف المجالات بطريقة جديدة كليا و بالمجان.

 الإحصائيات

تخول منصة مقال كلاود للكاتب الحصول على جميع الإحصائيات المتعلقة بمقاله بالإضافة إلى مصادر الزيارات .

 الكتاب

تخول لك المنصة تنقيح أفكارك و تطويرأسلوبك من خلال مناقشة كتاباتك مع أفضل الكُتاب و تقييم مقالك.

 بيئة العمل

يمكنك كتابة مقالك من مختلف الأجهزة سواء المحمولة أو المكتبية من خلال محرر المنصة

   

مسجل

إذا كنت مسجل يمكنك الدخول من هنا

غير مسجل

يمكنك البدء بكتابة مقالك الأول

لتبق مطلعا على الجديد تابعنا