ياسر شمس الدين يكتب اقتراحات للمؤسسة العسكرية لحصد ميداليات اولمبياد طوكيو - مقال كلاود
 إدعم  المنصة   
makalcloud
تسجيل الدخول

ياسر شمس الدين يكتب اقتراحات للمؤسسة العسكرية لحصد ميداليات اولمبياد طوكيو

خير لاعبى الارض

  نشر في 25 غشت 2016  وآخر تعديل بتاريخ 25 غشت 2016 .


بعد فشل لاعبى مصر فى اولمبياد ريو 2016 عندى اقتراح ناخد بيه كل ميداليات طوكيو بعون الله

الاقتراح هو عسكره الرياضة المصرية هتقولى ازاى اقولك يا سيادة اللواء اسمع منى :-

1- رياضة الرماية

احنا نجيب الظابط المشهور بقناص العيون ومعاه العسكرى بتاع جدع يا باشا وبدل ما هو عمال يصطاد عيون العيال فى المظاهرات يصطاد الدهب فى طوكيو تبقى ميدالية مضمونة


2-رياضة السباحة

هنجيب ضفدعين او 3 ضفادع من بتوع القوات المسلحة من اللى اسروا قائد الاسطول السادس الامريكى ونطلقهم فى حمامات السباحة فى طوكيو وياباشا هتشوف اللى عمرك ما شوفتوا بس لازم ياخدو معاهم حرس عشان الامريكان اللى هناك ما يخطفوش الضفادع ديه


3-رياضة الجودو والمصارعة

عدد 6 مخبرين من اللى بيقبضو على العيال فى المظاهرات واحنا بنشوفهم بيشولهم ويرموهم ازاى فى عربيات الترحيلات ولا رميه هشام مصباح اللى اخد برونز ولا كرم جابر بتاع المصارعة ولازم تفهموهم ان المصارعين اللى هيلاعبوهم اخوان عشان يلعبوا بضمير وما يتكرمشلهمش 50 ين يبانى ويبيعوا الماتش


4- كرة القدم .. الطايرة ... اليد

سيبونا بقى من لاعيبه الاهلى والزمالك والشغل الخايب بتاع اللعيبه التعبانة .... احنا نعمل منتخب من خير لاعيبة الارض منتخب من اندية

الانتاج الحربى .. الجيش .. الداخلية ... حرس الحدود وشوفوا يا باشا خير لاعيبه الارض هتعمل ايه فى نيمار وفرقة البرازيل هتبهدلهم وهيطلعوا مواهب المؤسسة العسكرية فى بناء الكبارى ان كل لاعيبة المنتخبات اللى هيفرومها فى الملعب هيدوهم كبارى واخرام للصبح

ومش هناخد الاولمبياد بس لا ابسليوتلى ده كاس العالم كمان


4-رياضة السلاح

احنا عندنا 1.5 جندى امن مركزى احنا نشوف احسن ناس فيهم بيضربوا العيال فى المظاهرات ونعمل منهم منتخب الشيش والسلاح ممكن نستعين ببعض الجنود اللى كانوا ضد المظاهرات فى يناير 2011 عندهم خبرة جامده


5- رياضة الجرى

عندنا فى الداخلية مواهب اللى هما اسمهم الجراية ودول اللى بيجرو ورا الحرامية اللى بيسرقوا الشنط فى مصر وبردوا بيجروا ورا المظاهرات وانتوا عارفينهم يا باشا صواريخ يبطلوا سجاير بس وشوفوا احلى ميداليات او نجيب الحرامية نفسهم بيجروا كويس برضوا ومش هتفرق كتير الاتنين واحد سواء الحرامية او ولاد المؤسسة العسكرية وانت فاهمنى طبعا يا كبير 


6- رياضة الجمباز الايقاعى

هنا بقى ممكن نستعين بصديقة المؤسسة العسكرية الفنانه صافيناز ووعد يا باشوات كل ميداليات الجمباز هتكون مصرية بس ندى صافيناز الجنسية المصرية عشان خاطر مصر


7-ركوب الدراجات

ماقلكش بقى على الموهبة المدفونة اللى عندنا هتسالنى تقولى مين اقولك هو فيه غيروا الكبير اوى سياده المشير عبد الفتاح السيسى اديلوا بس عجلة نضيفه بدل العجلة ام 45 الف جنيه اللى عمال يركبها فى المعمورة وشوف كميه الانجازات اللى هتحصل فى ميداليات الدراجات


واخيرا ديه اقتراحات مواطن محب للرياضة العسكرية ارجوا الا تهملوها وتجعلوها حبيسة الادراج كشباب مصر المحبوسين لديكم فى السجون وتحيا مصر 3 مرات



  • Yasser Shams Aly
    مدون وصحفى منذ عام 2006 مؤسس جركة شباب 6 ابريل الجبهة الديمقراطية بالاسكندرية
   نشر في 25 غشت 2016  وآخر تعديل بتاريخ 25 غشت 2016 .

التعليقات


لطرح إستفساراتكم و إقتراحاتكم و متابعة الجديد ... !

مقالات شيقة ننصح بقراءتها !



مقالات مرتبطة بنفس القسم

















عدم إظهارها مجدداً

منصة مقال كلاود هي المكان الأفضل لكتابة مقالات في مختلف المجالات بطريقة جديدة كليا و بالمجان.

 الإحصائيات

تخول منصة مقال كلاود للكاتب الحصول على جميع الإحصائيات المتعلقة بمقاله بالإضافة إلى مصادر الزيارات .

 الكتاب

تخول لك المنصة تنقيح أفكارك و تطويرأسلوبك من خلال مناقشة كتاباتك مع أفضل الكُتاب و تقييم مقالك.

 بيئة العمل

يمكنك كتابة مقالك من مختلف الأجهزة سواء المحمولة أو المكتبية من خلال محرر المنصة

   

مسجل

إذا كنت مسجل يمكنك الدخول من هنا

غير مسجل

يمكنك البدء بكتابة مقالك الأول

لتبق مطلعا على الجديد تابعنا