القول المفيد في الغلا والترشيد - مقال كلاود
 إدعم  المنصة   
makalcloud
تسجيل الدخول

القول المفيد في الغلا والترشيد

القواعد العشرة لمواجهة ازمات تعويم الجنية

  نشر في 15 نونبر 2016 .

مش هنتكلم النهاردة عن التعويم وشرحة وفوايده واضراره

هنتكلم النهاردة عن الاثار الجانبية لموجة الغلاء اللى ضربت البلد ولسه هتزيد بسبب  التعويم

 جمعتلكم  10 نصايح فيهم الخلاصة - من وجهة نظري - علشان الهزات العنيفة اللى بنمر بيها في الغلاء والاقتصاد متأثرش علينا كتير او نعدي منها با أقل خساير ممكنة

يعنى بالبلدي كده نأمن نفسنا وبيوتنا وحياتنا...

ورقة وقلم معايا ياستاذ منك ليه، ورقة وقلم بسرعة ياست الكل

واكتبو ورايا :

1- حاول تصرف فلوسك فى ما يستحق فقط يعنى المهم فالاهم، وكل حاجة ينفع تأجلها دلوقتي اجلها، يعنى مصاريفك العادية حاول تدخر منها على قد ما تقدر، ولو معملتش كده دلوقتي صدقني هتعمله كمان شويه غصب عنك.

2 - بلاش تحوِّش اى سلع استهلاكية حتى لو عارف ان سعرها هيغلا او طلعت اشاعة انها هتختفي، لان اللى بتعمله هيساهم فى حدوث ده فعلا حتى لو متوفر ومتاح، لما كل واحد هيحوش ويخزن يبقى السلعة هتشح فى السوق ييجى المحتكرين يلموا الموجود وهووووب يرفعوا السعر .

يقول الامام علي بن ابي طالب  : والناس من خوف الفقر  في  الفقر.

والجملة دي بتلخص كل الكلام اللى فوق.

3 - لو بتفكر تفتح مشروع دلوقتى، معلش امسك نفسك شويه لحد ما تعرف السوق رايح فين ، متوقع حدوق حالة من الركود هتأثر عليك بشكل كبير ممكن تضيع تحويشة عمرك من غير ما تعرف اسباب الفشل ايه.

4 - لو معاك مبلغ كبير مش هتعرف تحتفظ بقوته الشرائيه لإن وجوده كنقود فى حد ذاتها عرضه للتقلبات الاقتصادية ممكن تخسر نصها حتى لو فى البنك ،

نضرب مثال:

لو معاك 100 الف جنيه شايلهم فى البنك بقالهم سنه لما كان الدولار ب 7.50 قيمتهم دلوقتى تساوي 50 الف جنيه لما الدولار وصل ل 15 جنيه !!!

طيب اتصرف ازاى وانت قلتلى بلاش تحوِّش فلوسك ومتعملش مشاريع ؟ اروح اشتري بيهم دولار مثلا وأخزنه ؟؟؟

لا طبعا انت كده هتساهم فى زيادة الازمة

ممكن تعمل ايه فى الحالة دي ؟ تدور على استثمار آمن وطويل المدي يحفظ فلوسك بشكل شرعي ورسمى لاكتر من سنه ويحافظ على قوتها الشرائية

زى ايه ياعم حيرتنا معاك ؟

عندك الدهب ... ممكن تشتري سبائك دهبية، مصنعيتها قليلة وبعد سنتين او تلاته سعرها بيزيد ومش هتأثر على اى حاجة تاني

ممكن العقارات ... تشتري قطعة ارض بعد دراسة متأنيه او تشتري شقة فى مكان كويس ، او تشارك في اتحاد ملاك يحفظ قوتك الشرائية وفلوس تساهم فى حركات بيع وشراء حقيقية .

ولو لازم ولابد تحولهم دولار يبقى تفتح بيهم حساب في بنك مش تخزنهم في البيت عندك لاسباب كتير تتعلق بالغلا اللى احنا فيه مش بس بالواجب الوطني.

5 - نقطة مهمة كمان ... لو بتشتغل فى وظيفة راتبها معقول او حتى ضعيف امسك فيها بإيديك وسنانك، واياك تسيبها الا لو ضامن غيرها بسبة 100% صدقنى افضل كتير من قعدتك فى البيت فى الايام دى .

6 - لو مديرك قارفك ومكرهك في عيشتك او ضغوط الشغلانه فوق الاحتمال ، معلش افتح معاه صفحة جديدة لان اللى جاي اصعب بكتير من دمه التقيل، وضغط الشغل... انشف شويه كده واتحمل.

 7 - ولو مستقر فى شغلانه واحدة ومكتفي براتبها انت وعيلتك طول الشهر بشكل معقول، يبقى جه الوقت انك تدور على شغلانه تانيه جنب الاولى لانك هتحس بالفارق في النفقات وبعد مايعدي 20 يوم من الشهر مش هتلاقي تصرف منين.

8 - ولو مش عارف تشتغل شغلانه تانية، يبقى تقلل نفاقاتك الشهرية معندكش رفاهية الاختيار

لو بتاكل لحمة مرتين فى الاسبوع خليهم مرة، بتركب تاكسي، يبقى سرفيس، بتجيب علبة دوا خليه شريط واحد ، بتشرب سجاير يبقى انسب وقت تبطل....

بتجيب ورد وشيكولاته !! يابختك

صدقنى هتقدر قيمة كلامي بعدين .

9 - كل منتج مستورد انت بتجيبه حاول تدور على بديله المصري وتجربه وتشوف جودته، لو طلع قريب من المستورد استبدله لان المصري هيكون أوفر وانت هتحتاج فرق السعر ده على مدار الشهر، وهتفيد الصناعة الوطنيه وتحد من الاستيراد

يعنى الخطوة دى هتحقق 3 مكاسب

واحد علشانك واتنين علشان البلد.

اما لو البديل المستورد احسن كتير والمصري ردئ مقدرش أدعمه او اقولك اتنازل عن الجودة

احنا ندعم الوطني اللى يستحق وبس.

10 - الاخطر والاهم بقى، الصدقة ياجماعة

كل اللى فات لازم نتقشف فيه الا انك تتصدق اهى دى النقطة اللى لازم تزود فيها او حتى تحافظ على قيمتها ثابته، لانك بكل بساطه كنت عايش ب2000 جنيه قبل الازمة دى بالعافية ودلوقتى مبقتش عارف تعيش ، صح كده

اسأل نفسك بقى اللى كان عايش بألف جنيه حاله إيه دلوقتي

طيب اللى كان عايش ب500 !!!

طيب اللى عايش على الصدقة والناس بدأت تتقشف فطبعا هتققل او هتمنع اللى كانت بتدفعه خالص ، ده هيعيش ازاى دلوقتي ؟

يبقى انت لازم تحاول بأي طريقة انك تزود الصدقة علشان تعوضه هوه كمان عن المطب ده ، وصدقنى تماما بكل ثقة قسما بالله ربنا هيعوضك خير، ويمكن لو تماسكت فى الازمة دى يكون ببركة صدقاتك واحساسك بالمعدمين دول.

لو شايف الخطوات دي مهمة ياريت تعمل لها save علشان ترجع ليها من وقت للتاني، او تنشر البوست لغيرك علشان ياخد باله من اللى جاي.

بعتذر عن الاطالة،

وارجو اكون قدمت روشته كده تساعدنا على فهم اللى جاي ومحاولة تخفيف الصدمة اللى بالمناسبة لازم هتحصل والكل هيتأثر بيها.

وبندعي كلنا يارب يعدي الايام دي على خير ويحفظ مصر واهلها الطيبين.



   نشر في 15 نونبر 2016 .

التعليقات


لطرح إستفساراتكم و إقتراحاتكم و متابعة الجديد ... !

مقالات شيقة ننصح بقراءتها !



مقالات مرتبطة بنفس القسم

















عدم إظهارها مجدداً

منصة مقال كلاود هي المكان الأفضل لكتابة مقالات في مختلف المجالات بطريقة جديدة كليا و بالمجان.

 الإحصائيات

تخول منصة مقال كلاود للكاتب الحصول على جميع الإحصائيات المتعلقة بمقاله بالإضافة إلى مصادر الزيارات .

 الكتاب

تخول لك المنصة تنقيح أفكارك و تطويرأسلوبك من خلال مناقشة كتاباتك مع أفضل الكُتاب و تقييم مقالك.

 بيئة العمل

يمكنك كتابة مقالك من مختلف الأجهزة سواء المحمولة أو المكتبية من خلال محرر المنصة

   

مسجل

إذا كنت مسجل يمكنك الدخول من هنا

غير مسجل

يمكنك البدء بكتابة مقالك الأول

لتبق مطلعا على الجديد تابعنا