مشاكل الزواج - مقال كلاود
 إدعم  المنصة   
makalcloud
تسجيل الدخول

مشاكل الزواج

اولى مقالاتى

  نشر في 09 غشت 2017 .

اسف طبعا لو فى اخطاء فى المقال بس ده اول حاجة اكتبها فا

الموضوع حيبقى باللغة العامية علشان اقدر اعبر عن العايز اقوله بطريقة سهلة ومفهومة واسف لو خلط بعض العربية الفصحى مع العامية

---------------------------------------------

مقدمة:

-------

الزواج طبعا كلنا بنتمنى يجى الوقت ونكمل نص دينا ونتجوز ونفسنا نبقى ام او اب

--------------------------------------------

الاخطاء التى نقع بها :

-------------------------

خلونا نفكر الاول هل انت قد مسؤولية الجواز وهل انتي قد مسؤولية الجواز كثير بنسمع عن جواز فتاة عمرها 18 سنة من شاب 18 سنة وممكن اصغر كمان 16 سنة وممكن اصغر

هل هذا شئ جيد هل تظنوا انهم

قد المسؤولية؟

انت ايها الشاب هل تقدر تتحمل مسؤولية عيلة واطفال وتتحمل مسؤولية زوجتك

وانت ايها الفتاة هل تقدرى على مسؤولية الاهتمام بطفل والاهتمام بجوزك

نصيحة : للشباب والبنات ياريت نتاكد فعلا قبل الجواز اننا نقدر نشيل المسئولية علشان مانندمش بعد الجواز وبدل ما الجواز احلى شئ فيبقى اسوء شئ

---------------------------------------------

جواز اجبارى :

-----------------

جواز اجبارى بقى تلاقى البنت اهلها جايبينلها عريس وفجاة تتجوز وهى حتى ماتعرفش حاجة عنه لا ويقولك حتحبيه بعد الجواز

سؤال لاهل البنت ده : طب ولو ماحبتهوش بعد الجواز تعمل ايه ؟؟

وتكون بقى خلفت عيل ويبقى قدامها حلين يا تطلق وترجع بيت اهلها واهلها يبهدلوها ويحبسوها اه اصلها مطلقة بقى ماينفعش تخرج ماينفعش تتحرك وبعد كدة حيقولوا حرام تتنفس يا تفضل عايشة معاه وتتبهدل وتكره حياتها لانها حتعيش باقى حياتها مع شخص مابتحبهوش والسبب انها مش عايزة تغضب اهلها هى حياتها تتدمر عادى بس ماتغضبش اهلها واهلها يموتوا ويسيبوها وبرضه علشان ماتغضبهمش وتكره باقى حياتها وتتمنى الموت كل لحظة بس ماتعضبش اهلها وفى الاخر ممكن تنتحر وتبقى كافرة

اه بس اهم حاجة ما اغضبتش اهلها

نصيحة: للاهل بلاش تضغطوا على بناتكم او اولادكم بالجواز وخليهم يختاروا البيحبوه وكمان مش اى عريس يتقدم للبنت توافقوا عليه اديلها فرصة تتعرف عليه وفترة الخطوبة انسب فترة لكدة وممكن يكون على خلق وغنى بس البنت ماتحبهوش عادى وعايز اقول كلمة اخيرة هنا اوعى تجبروا بناتكم يتجوزا شخص لان انتم حتسيبوها وتنتقلوا للدار الاخر وهى الحتكمل حياتها معاه فخلوها تختار الهى حتبقى سعيدة معاه

---------------------------------------------

الفلوس والجواز

--------------------

طبعا كلنا عارفين دلوقتى اسعار الذهب والبيوت ومع ذلك برضه الاهل بيطلبوا مهر عالى تلاقى الشاب من دول رايح يتقدم للبنت واهلها يطلبوا منه مهر مش اقل من ربع مليون ولا 100 الف لا وشقه مش عارف ع الكورنيش وشبكه بكام والفرح يبقى فقاعة بالشئ الفلانى اه اصل ماينفعش البت يجيلها شبكة اقل من بنت خالتها ازاى !! ولا تعمل الفرح فاى مكان بيخلوا الشاب يسيب البنت البيحبها ويتجوز اى واحدة والبنت تتجوز اى واحد اهلها بيجيبوه مش معاه فلوس خلاص حتى لو تاجر مخدرات عادى مش معاه فلوس يبقى تمام حيعيشها مبسوطة حتى لو من الخليج ومتجوز اتنين بس معاه فلوس يبقى تمام برضه وحتى ده الشرع حلله اربعة مش مشكلة لما تبقى الثالثة مش معاه فلوس يبقى حتعيش مبسوطة بالنسبالهم الحب مالهوش قيمة مابياكلش عيش لكن الفلوس هى البتاكل عيش مش مهم البنت بقى تعيش مهانة او كرامتها تدمر عادى لا بقى واسوء انواع العائلات لما يجيلهم عريس غنى وتلاقيهم بيقولوا للبنت وافقى عليه علشان يعيشنا فمستوى احسن يعنى بيبعوا بنتهم مش مهم بقى تعيسة معاه ولا مبسوطة المهم انهم يبقى معاهم فلوس انا عايز اقول للعيلة ده حاجة واحدة حسبى الله ونعم الوكيل فيكم

حسبى الله ونعم الوكيل فيكم

انتوا عايزين تتحرقوا

بتموتوا بنتكم بالبطئ علشان تعيشوا مبسوطين لا ولما تسال حد من الاهل بيرد الرد المحفوظ انا عايزها تعيش مبسوطة

لكن الحقيقة

انهم هما البيبقوا عايزين يعيشوا مبسوط

لكن الحق يتقال برضه ان بعض الاهل بيبقوا عايزين مصلحة بنتهم وفاكرين ان الغنى هو الحيسعدها وده تفكير غبى ورثوه من اهلهم.

نصيحة : بلاش الطلبات المبالغ فيها والمهر الكبير والذهب والشبكة كل ده حاجات مش حتفيدها ولو هو بيحبها حيشيلها فعينيه ويجيبلها الهى عايزاه وطالما راجل على خلق ومحترم وشاريها يبقى خلاص ممكن تلغوا المهر وتزودوا المؤخر لانه هو شاريها وهى شارياه وعارف انه حيعيش معاها العمر كله مبسوط ومش حينفصلوا باذن الله

---------------------------------------------

الطلاق

--------

المجتمع الشرقى للاسف لسة متخلف وبيبص للبنت المطلقة بنظرة استحقار

---------------------------------------------

للمرأة:

--------

فى بنات كثير بترفع دعوة طلاق وبيبقى لاسباب كثير بس السبب الحناقشه النهاردة هو سوء المعاملة كثير اوى ازواج بيعاملوا زوجاتهم بطريقة سيئة زى الضرب والاهانة

ففى منهم بيسكت ودول للاسف بيبقى بسبب اولادها او علشان المجتمع مايبصلهاش بنظرة وحشة لكن منهم البيبقى شجاع وانا عايز اقول للبنات ده برافو برافو برافو حقيفى انت تستحقى كل الاحترام لانك ما اهتمتيش لاى حد وبصيتى لكرامتك ولا استحملتى الاهانة السببها ليكى وعايز اقول لكل بنت او ام اوعى تستحملى الاهانة او تحطيم كرامتك حتى ولو علشان اطفالك وصدقينى لو انفصلتوا حيبقى تحسن كثير لاطفالك يعيشوا مع واحد منكم بس على انه يعيش ويكبر فجو كله خناق ومشاكل وشتيمة واهانة

للراجل:

عايز اقولك حاجة خليك راجل فعلا وطلقها وماتقولهاش حخليكى زى البيت الوقف مش حطلقك وخليك راجل ولو فحاجة واحدة لانك لو عايز تفضل عايش معاها وتبهدلها فانت كدة مش بس فقدت رجولتك انت فقد ادميتك وبقيت شبه الحيوان وخليك فاكر انها ممكن تخلعك

طبعا انا هنا اتكلمت عن فكرة واحدة بس فموضوع الطلاق وهى لما الزوج يكون المخطئ بس مايمنعش ان فى اوقات بتبقى الزوجة الغلطانة برضه بس لو تطرقنا لكل مواضيع الطلاق يبقى محتاج مقال لوحده لكن المقال ده مخصص للجواز فانا اخدت جزء بس الهو الاهم فموضوع الطلاق

نصيحة :

للبنت : اوعى ترضى بالاهانة واطلبى الطلاق لو الحياة مستحيلة بينكم وماتهتميش لراى الناس ولا المجتمع

للراجل : لو مراتك طلبت الطلاق حتى لو انت معيشها فنعيم وبتحبها وكل محاولات المصالحة بينكم فشلت فوافق على طلبها بدل ماتعيش باقى حياتها معاك حزينة وحبك ليها يتحول لكره ليها

---------------------------------------------

الابناء:

----------

خلينا متفقين ان اكثر حد بيتظلم فى المشاكل بين الاب والام هم الابناء وده سبب وجود اطفال الشوارع وادمان الشباب وتلاقى الاب والام كل واحد بيلوم التانى ويعمل نفسه من بنها وتلاقى الاب يقولك انا معيشه احسن عيشة ليه يبقى مدمن

وهو فنظر حضرتك ايه احسن عيشة انك بتجبله اكل وشرب وفلوس وخلاص لكن لما ابنك يشوفك كل يوم فمشاكل مع امه وصداع ومافيش حاجة حلوة بتكمل ولما يروح المدرسة يلاقى صحابه بيتكلموا وكل واحد فرحان بابوه وهو مش عارف يقول ايه ومايقدرش يقول ع المشاكل ويفضل كاتم جواه كل حاجة لغاية ما يبقى مدمن وترجع تقول ليه وبرضه الام تقولك انا بعمل كل حاجة علشانه ليه يبقى مدمن وحضرتك ايه فكرتك عن ابنك تعرفى ايه عنه ما انتى لو كنتى مصاحباه وبتتكلمى معاه كان حكالك لكن هل فكرتى فمرة تاخديه فحضنك وتسالية لا طبعا مستحيل وتقولى ابنى متربى عمره مايعمل حاجة غلط وكمان ممكن تقولك ده انا مستحمله كل المشاكل علشانه وماطلبتش الطلاق ، حلوة جينا لمربط الفرس والله انتى لو طلبتى الطلاق واخدتيه يعيش معاكى واهتميتى بيه اكثر وحيبقى صحى ليه اكثر لو عاش مع واحد فيكم بس بدون مشاكل على انه يعيش مع الاتنين فجو مليان مشاكل

وياريتها تيجى على الادمان وبس فى ابناء ممكن ينتحروا بسبب المشاكل والضغط بين الاب والام وفى صديق قالى جملة فمرة ان الضغط مش حيفضل دايما واكيد حينتهى

وان الشخص لما بيضغط عليه اوى لدرجة انه حينفجر بيحصل حاجة من اتنين يا بيدمر خالص وممكن ينتحر او بيتولد من جديد بعد ما الضغط يختفى وبيبقى انسان ناجح وذكى ويعرف يتعامل مع الواقع

نصيحة: للابناء طبعا اليقدروا يفهموا كلامى عايز اقلكم حاجة اوعوا تفكروا ابدا انكم تروحوا طريق الادمان حتندموا طوال حياتكم واوعوا تفكروا فى الانتحار فانت لو مت كافر اهلك حيخسروا ايه ولا حاجة خليك قوى انت اقوى من كل الظروف وبدل ما الناس حتقول ده انتحر بسبب الظروف حتقول ده نجح رغم كل الظروف 😊

---------------------------------------------

الخاتمة :

------------

طبعا انا كتبت بس موجز سريع عن كل حاجة لكن لو تطرقنا لكل فقرة فحتحتاج مقال كامل ليها وفى النهاية اتمنى يكون عجبكم المقال او زى ماتسموه يعنى وطبعا عايز ان كل ده رأيى الشخصى ومن التجارب الشفتها والكلام السمعته وكل شخص له رأيه الشخصى

وان الاختلاف فى الرأى لا يفسد للود قضية 


  • 1

   نشر في 09 غشت 2017 .

التعليقات


لطرح إستفساراتكم و إقتراحاتكم و متابعة الجديد ... !

مقالات شيقة ننصح بقراءتها !



مقالات مرتبطة بنفس القسم













عدم إظهارها مجدداً

منصة مقال كلاود هي المكان الأفضل لكتابة مقالات في مختلف المجالات بطريقة جديدة كليا و بالمجان.

 الإحصائيات

تخول منصة مقال كلاود للكاتب الحصول على جميع الإحصائيات المتعلقة بمقاله بالإضافة إلى مصادر الزيارات .

 الكتاب

تخول لك المنصة تنقيح أفكارك و تطويرأسلوبك من خلال مناقشة كتاباتك مع أفضل الكُتاب و تقييم مقالك.

 بيئة العمل

يمكنك كتابة مقالك من مختلف الأجهزة سواء المحمولة أو المكتبية من خلال محرر المنصة

   

مسجل

إذا كنت مسجل يمكنك الدخول من هنا

غير مسجل

يمكنك البدء بكتابة مقالك الأول

لتبق مطلعا على الجديد تابعنا