الشر يكمن في التفاصيل - مقال كلاود
 إدعم  المنصة   
makalcloud
تسجيل الدخول

الشر يكمن في التفاصيل

  نشر في 26 أبريل 2016 .


1

اكفينا شر البنات المتعلقه

و ارزقنا حب الإيدين المتشققه

و اكفينا شر الحب من غير نول

و اكفينا مد الكف

و شر الطالح إن عف

و متكفيناش من الموت

عشان جاي جاي

بس اكفينا من الموت للقلب

و الجسم حيّ

و اكفينا شر الفعل اللي يغضب

و شر الكلام اللي يقلب

للدنيا موازينها

و اكفينا من الدنيا

من مرها و زينها

و اكفينا بيك عن غيرك

و اكفينا شر عبيدك

اكفينا شر الكروب

2

و شر القلوب القاسيه

و اكفينا شر الهروب

و شر العقول الناسيه

و اكفينا شر الرجوع

في وعد قاطعينه

و اكفينا مد الإيد

لحلم مش طايلينه

و اكفينا شر الضحكه الزايفه

و شر القلوب الخايفه

و اكفينا شر الزهق

عشان بيتعب

و شر القلق

عشان بيرهب

و اكفينا شر الملل

و شر كل أمر جلل

3

اكفينا شر الغصب

علي حاجه كارهينها

و اكفينا شر البعد

عن حاجه عاوزينها

و اكفينا شر القوة

و الضعف بعدها

و اكفينا شر الكلمة

لو مش في محلها

و اكفينا شر المال

و شر القلب لو مال

و اكفينا شر الروتين

و اكفينا شر العين

و اكفينا شر السعاده

اللي مش بتدوم

و شر الحزن

لما يحوم

4

اكفينا شر المعافره

في سكه مش سالكه

واكفينا شر التوهه

و الطرق حالكه

و اكفينا شر الاهتمام

باللي ما يستحق

و شر القاسي لما يرق

و اكفينا شر السكات

في وقت مش وقته

و اكفينا شر الكلام

و اكفينا شر حلاوته

و اكفينا شر الوجود

و العقل غايب

و اكفينا شر الغياب

عن قلب دايب

5

اكفينا شر الشِدة

علي ناس غاليه

واكفينا شر الشَده

في موجه عاليه

و اكفينا شر اللين

مع كل متساهل

و اكفينا شر صديق

في وقت الشِده

مش سائل

و اكفينا شر الصبر

اللي بعده مفيش

و اكفينا شر القبر

لما رضوان ميجيش

و اكفينا شر الجوف

لما يغلي

و شر النهار

لما يجلي

الغمام عن كل حاجه

و اكفينا شر الحاجه

6

اكفينا شر التواكل

عشان مبيوصلش

و اكفينا شر الملامه

اللي مبتأثرش

و اكفينا شر البرود

عشان بيموت

و اكفينا شر الجمود

عشان بيفوت

فرص من تاني مش راجعه

و اكفينا شر البدعه

و اكفينا شر الجرح

لما يزن

و شر القلب

لما يحن

و شر العقل

لما يجن

7

اكفينا شر الحرام

عشان النار بيه أولي

و اكفينا شر الجاحد

عشان ملوش مَولي

و اكفينا شر الفضفضه

للشخص الغلط

و اكفينا شر العيب

و شر خُلو الجيب

و اكفينا شر الدم

اللي مش بالحق

و اكفينا شر الهم

و اكفنا شر النَم

و اكفينا شر الثقة الزايده

عشان بتغُر

و اكفينا شر الانتظار

و ثوانيه اللي مش بتمُر

8

اكفينا شر الخير

لو مش معمول لوجهك

و يكفينا شر عدو

يغدرك ما يواجهك

و اكفينا شر السُلطة

عشان بتغير

و شر الوسواس

عشان للنوم بيطير

و اكفينا شر الانعزال

عشان بيأخر

و شر الأخ

اللي ما يقَّدر

و اكفينا شر المدح

بحاجه مش موجوده

و اكفينا شر الدوخه

علي حاجه مفقوده

9

اكفينا شر الفخر

بحاجه مش فينا

و اكفينا شر الاحتياج

لحاجه مش لينا

و اكفينا شر الاشتياق

لأي حد ناسينا

و اكفينا شر أي نهايه مفتوحه

عشان بتلغبط

و اكفينا شر الفؤاد

لما بحاجه يتشعبط

و اكفينا شر هدة الحيل

علي حاجه مش هنوصلها

و اكفينا شر الناس

لما الغل يسكن قلبها

و اكفينا شر الشرور

و شر انعدام النور

10

اكفينا شر المكان

اللي ما بيريح

و اكفينا شر اللهفه

اللي بتسيح

جوا العقول أفكار

واكفينا شر النار

و اكفينا شر حاجات

ما نعرفها

و اكفينا شر الفرحه

لما يخطفها

خبر مشئوم

و اكفينا شر النوم

و اكفينا شر النفاق

و شر عدم الاتفاق

و اكفينا شر النهاية........



  • Mahmoud Safy
    بحب اكتب شعر ساعات و ساعات تانيه مواضيع تخص حياتنا بس بعمق شوية
   نشر في 26 أبريل 2016 .

التعليقات


لطرح إستفساراتكم و إقتراحاتكم و متابعة الجديد ... !

مقالات شيقة ننصح بقراءتها !



مقالات مرتبطة بنفس القسم

















عدم إظهارها مجدداً

منصة مقال كلاود هي المكان الأفضل لكتابة مقالات في مختلف المجالات بطريقة جديدة كليا و بالمجان.

 الإحصائيات

تخول منصة مقال كلاود للكاتب الحصول على جميع الإحصائيات المتعلقة بمقاله بالإضافة إلى مصادر الزيارات .

 الكتاب

تخول لك المنصة تنقيح أفكارك و تطويرأسلوبك من خلال مناقشة كتاباتك مع أفضل الكُتاب و تقييم مقالك.

 بيئة العمل

يمكنك كتابة مقالك من مختلف الأجهزة سواء المحمولة أو المكتبية من خلال محرر المنصة

   

مسجل

إذا كنت مسجل يمكنك الدخول من هنا

غير مسجل

يمكنك البدء بكتابة مقالك الأول

لتبق مطلعا على الجديد تابعنا