ليه الدنيا الكبيرة تزول واحنا كل يوم بنموت من الحسرة والجوع

ليه باحس إني فارس معزول مع إني ممكن أغير وأكون رسول

رسول للحق والخير المهزوم وسط فساد وذل وحاكم مجنون

أنا إنسان زي البشر لا عمري هاكون مقدس ولا حتى معصوم

في كل لحظة شجون باطهر نفسي من كل كذب وصمت وسكون

لو كان الحزن بيظهر في كل العيون مكناش نهدم بايدينا صخور

ولا كان للكف قاريء يفك خفايا الصدور بيسمع لجني من ورا البحور

أنا مش مسحور لكني مظلوم في زمن بيعلى فيه كل تافه مغرور

في يوم هايجي هاتضحك الدنيا ليا وأكون أنا البطل أنا المنصور

الحياة تجري وتلف بينا داير ما يدور وتاهت عنا الشمس والنور

واختفى الحب على جدار كل سور وسكت صوت العصفور

أنا مش ممكن أعيش مكسور ولا هايم وسط الجبال والثغور

وبنبرة إنسان حنون مشيت وانا شايل كل الهموم والحمول

ووقفت على باب كل مسجون أنادي على كل مظلوم

ودعيت بأعلى صوتي لكل أم وكل أب مكلوم

ولما المرض بسيفه المسنون قتل صوت العنف والجنون

وصار الموت أقرب لنا من سوط الجلاد المسعور

عرفنا أن القبر راحة من لحظات الجوع والذل والفجور

يا الله يا خالق الكون والطيور نجنا من الكرب وريب المنون