الخلق للخالق - مقال كلاود
 إدعم  المنصة   
makalcloud
تسجيل الدخول

الخلق للخالق

  نشر في 29 شتنبر 2018 .

جربت تكون راجع قبل كده من المدرسه و أنت كاره نفسك و شكلك عشان أطفال فى سنك قالولك شكلك وحش أو شعرك وحش أو ضربوك لـمجرد إنك جسمك ضعيف عنهم .

طب جربت ترجع من الكليه و انت خايف ترجع تانى للمدرجات أو للامتحانات بسبب دكاتره موجودين مهمتهم ف الحياه إنهم يلعبوا بأعصابك و كل كلامهم ليك و لغيرك عباره عن تهديد بـالسقوط و النجاح .

طب لو مجربتش دول جربت بعد ما تتخرج إن أحلامك تبدا تقل تدريجيٱ بسبب إنك بقيت ف أرض الواقع و محدش جنبك و كل اللى حواليك مبيعملوش غير التقطيم ليك و الاحباط و كل واحد عاوزك تبقى نسخه منه و تمشى فى نفسه كاريره من غير تفكير فيك إنت هتقدر تعمل ده و لا لأ ؟!

جربت فى مره ترجع من خروجه و مصاحبك إحساس إنك مش عاوز تخرج تانى و حابب تنعزل عن اللى حواليك لمجرد إن حد قالك تعليق على ضحكتك أو وزنك مثلٱ ؟!

طب ده يتسمى إيه !! و الناس بتعمل كده ليه ؟! و تفتكر ده بيأثر فى شخصيتنا و فى حياتنا ؟! طب ممكن الاسلوب ده لو زاد عن حده يوصلنا إحنا لايه ؟!

المواقف البسيطه دى تُـعتبر قله قليله من اللى بيحصل .. المواقف دى بتندرج تحت صفه فى الشخص اللى بيعمل كده اسمها التنمر .

ف الايام الاخيره اتعملت حمله إعلانيه كبيره عن التنمر و بتتكلم إن بيبقى ليها أثر نفسى كبير ف تكوين شخصيه البنى ٱدم اللى بيتعرض للتنمر و هو صغير او وهو كبير .. تعالوا نتكلم بشكل أوسع عن التنمر

نعرف الاول يعنى إيه تنمر ؟!

بالبلدى كده شخص عنده سلوك عدوانى بيحاول يفرض سيطرته على شخص ٱخر عن طريق إنه يئذيه جسديٱ أو نفسيٱ أو عاطفيٱ .. و غالبٱ الاذى النفسى بيكون ٱثره أكبر فى الحالات دى .. ممارسه التنمر على أشخاص ممكن يحولهم لاشخاص متنمريين بعد كده .

بنقابل ف حياتنا أشخاص كتير بتعانى من التنمر و بتحاول تبقى هيا المسيطر علينا زى اصحاب ليك .. أعداء بردو ليك .. مدرس .. دكتور ف جامعه .. و أحيانٱ معيد .. مديرك ف الشغل .. مراتك .. جوزك .. و دائمٱ و ليس أبدٱ عائلتك المصونه .

طب الناس دى بتعمل كده ليه ؟!

من وجهه نظرى بسبب اختلاف الثقافات و عدم تقبل الاختلاف ده من جانب كل شخص تجاه الاخر .. فكره وجود أديان مختلفه .. طبقات مختلفه من المجتمع .. عقائد و سياسات فكريه متعدده .. فمن هنا بنلاقى اننا مبنقتنعش الا باللى فى دماغنا .. و مبنقبلش إن يبقى فى حد خارج نطاق تفكيرنا

على سبيل المثال :

أنت دكتور و متجوز دكتوره فتفكيرك كله بيبقى ازاى تخلى ابنك دكتور زيك و زى والدته وأى رأى لابنك فى الموضوع ده منتهى لانه ميعرفش مصلحته أكتر منك و هنا يبقى انت بتمارس سلطتك عليه .

لو عرفنا إن فى مريض بمرض زى الايدز و الكانسر بنبدأ نتعامل معاه اوتوماتيك على إنه عاله وسطنا و نبعد و نظراتنا ليه كجرثومه ماشيه ع الارض معانا لدرجه إنه ممكن يتالم من رد فعل الناس أكتر ما بيتالم من مرضه .

حتى فى السياسه لو فكرت تقول رأى خارج القطيع بيتهموك بانك عميل و خاين و ممكن تتسجن و يضيع مستقبلك لمجرد إن ليك رأى مختلف .

التحرش تنمر .. إنك تئذى حد بلمسه و هو مش من حقك او تئذيه بلفظ جنسى .. و أظن اغلب البنات كل يوم بتتعرض للتنمر فى مجتمعنا .

أفعال كتيره بتندرج تحت مُسمى التنمر زى العنف الاسرى .. الطلاق .. الاعتداء بالضرب أو بالسب .. السخريه المقصوده .. القتل .. التفرقه العنصريه .. و غيره من كل ما هو مؤذى لضحيه التنمر .

معظم الدراسات قالت إن أكتر فئه بتمارس التنمر هما الاطفال و المراهقين و ده ممكن يبقى بسبب إنهم :

إن أغلب الأطفال اللى بيمارسوا التنمر هم نفسهم تم ممارسة التنمر عليهم قبل كده .

أطفال بتعمل كده عشان الشهرة و تتجنب تعرضهم للتنمر .. اللى هو كُل نفسك قبل ما حد يجى و يأكلك و دايمٱ فى المدارس الواد الشقى المطقطق بيبقى زى ما بيقولوا كده متسيط و بيتعمله حساب و بيبقاله قاعده جماهريه كمان .

عدم الرقابه على المحتوى اللى بيشوفه من خلال وسائل الإعلام.

للاسف ممارسه التنمر أثره كبير على شخص بيتعرضله ممكن يوصله لدرجه فقدان الثقه بالنفس ..الانعزال و الميل اى الوحده .. الاكتئاب و القلق الدايم .. الانتحار 😔

أنا معرفش إيه الحل فى التعامل مع المشكله دى .. كل اللى اقدر أوله إن " دع الخلق للخالق "

لازم نتقبل بعض فى كل الاوضاع و كل الاشكال .. مندخلش فى حياه بعض بشكل يعدى حدودنا .. تربيه أولادنا على تقبل الغير كدين و شكل و لون و مرض .. نرتقى بتفكيرنا و الايمان بحريه الاختيار .. الاهتمام بالعامل النفسى عند الطفل و النظر الى اهتمامات الطفل بدرجه أهميه أكتر .

و فى الاخر أحب أقول إنى مش بعمم اللى كتبته ده على كل الناس و لكن معظمهم يعانى من التنمر بأشكال و درجات مختلفه .


  • 3

   نشر في 29 شتنبر 2018 .

التعليقات

لطرح إستفساراتكم و إقتراحاتكم و متابعة الجديد ... !

مقالات شيقة ننصح بقراءتها !



مقالات مرتبطة بنفس القسم

















عدم إظهارها مجدداً

منصة مقال كلاود هي المكان الأفضل لكتابة مقالات في مختلف المجالات بطريقة جديدة كليا و بالمجان.

 الإحصائيات

تخول منصة مقال كلاود للكاتب الحصول على جميع الإحصائيات المتعلقة بمقاله بالإضافة إلى مصادر الزيارات .

 الكتاب

تخول لك المنصة تنقيح أفكارك و تطويرأسلوبك من خلال مناقشة كتاباتك مع أفضل الكُتاب و تقييم مقالك.

 بيئة العمل

يمكنك كتابة مقالك من مختلف الأجهزة سواء المحمولة أو المكتبية من خلال محرر المنصة

   

مسجل

إذا كنت مسجل يمكنك الدخول من هنا

غير مسجل

يمكنك البدء بكتابة مقالك الأول

لتبق مطلعا على الجديد تابعنا