احكيلنا عن حالك شوي - مقال كلاود
 إدعم  المنصة   
makalcloud
تسجيل الدخول

احكيلنا عن حالك شوي

مثلاً فيك تكون بسيط؟

  نشر في 24 نونبر 2017 .

إحكيلنا عن حالك شوي ... :)

- مثلاً، أنا ميس.. بحب الهدوء والموسيقى والفن والرسم،بحب الليل والقمر و النجوم.. بحب السَهركتير لدرجة ممكن تفكرني بومة أو خُفّاش .. بحب الوِحدة و الشِعر والشموع ، بحب صِدق الأحاسيس..والفجر و أول الصبح..بحب الخريف والشتا والبرد والغيوم، بحب الجَمال والأناقة و البساطة.. بحب اللون الأسود ..وأحياناً بحسو لون ساكن جُواتي .. بحب السكوت و ما بحب الحكي الكتير .. من جهة تانية، بحب الفراشات والعصافير والضحك..بحب الربيع يعني بس أحياناً ما بحبو ، بسأل حالي دايماً .. في حدا متلي؟ أشاركو نفس تفاصيلي ؟.. في حدا ممكن أنا وياه نسكت و مع هيك نفهم على بعض؟ ❤️..

أنا هيك مثلاً.. بحب حالي متل ما أنا بكل مشاعري، إذا حبيت بحب بصدق و اذا ضحكت بضحك من قلبي ،واذا حزنت بحزن بصدق ..بس كاسة نسكافيه بتحسّن مزاجي، اذا بكيت ببكي بحرقة ..بس كبيرها شوية "مسكارة" برجعوا عيوني يلمعوا !.. يعني مابعرف ألبس أقنعة وألعب أدوار، الحياة بالنسبة إلي مسرحية آخرتها تخلص و نصفقلها.. من جانب تاني مني، اذا كرهت بكره من قلبي بس ما بنتقم لأني أحسن من هيك، بسامح بس مستحيل أنسى أصغر موقف جرحني، إذا قررت بيوم أنساك بنساك كأني ما عرفتك بيوم و ممكن تشك بوجودك :)..

يمكن أنا عنيدة،مزاجية ،أنانية ، مزعجة، حساسة ، عصبية اوقات و متسرعة.. بس قلبي طيب، الكلمة الحلوة على بساطتها بتنسيني همومي.. بس أنا كتومة كتير ،أحياناً بتحسني قوية بس بكون اضعف من ورقة خريف..و مرات تانية بتحسني ضعيفة بس بكون اقوى من ما تتصور، بوقع كتير و بَميل.. بس اذا قررت اوقف مرة تانية بوقف عن جَبلين ! .. جروحي لحالي بجبرها، بقدّر مشاعري كتير و ما بستنى حدا يقدّرها.. معودة حالي اوقف مع حالي و ما بصدق في حدا لحدا ،ما اشي بِدوم حتى مشاكلنا .. بنكسر كتير بس ما بتلاشى ،بتراجع كتير بس ما بستسلم، بآمن بالنفس الأخير .. و بكل مرة بموت فيها برجع بعيش،يعني زي ما تحكي" أنهضُ من بينِ رماد احترآقي" .. أنا وحدة ممكن تحسها مش مفهومة أحياناً أو مفصومة حتى، بس أنا وردة مع "شوكها" و فهمك كفاية..

أنا مو إجتماعية بس بحب الناس و بحب أساعدهم و أرسم الضحكة على وجوهم :)..

معظم الوقت بتحسني متل الجليد ملامحي حادّة و ببين بدون مشاعر، بس لأ..ضميري صاحي بزيادة، و اذا قربت مني و عرفتني منيح راح تعرف إنو ما في أدفى و أحن من قلبي .. بس مو الكل بيستاهل.. وما بقدّم مشاعري إلا لشخص بِعرف كيف يصونها لأنها أغلى علي منك ! .. ما بحقد أنا .. بس بنكسر خاطري اوقات و بِتعزّ علي كتير أشياء ، يعني اذا شفتني بضحي مشانك بأشياء صعب علي أضحي فيها و مستعدة أسلّم روحي متل الشهيد ،تأكد إني عشقتك و نادر يصير هيك ... !!

يعني فيك تحكي عني بسيطة و معقدة بنفس الوقت، فيك تحكي إني متواضعة جداً و بنفس الوقت نرجسية كتير يعني ما بتنازل عن صفة فيني بتعجبني ، ما عندي غرور بس كرآمتي فوق "كل شي" ، عندي أسرار بحجم سبعين مجرّة ، بس ما بحب الحكي و بحب الكتآبة .. أحياناً الحكي ما بفيد و بِكون الصمت أرقى، مع هيك أنا إنسانة مرحة كتير اذا ارتحتلك .. بحب السفر و الحفلات والرحلات الطويلة و المغامرات ، بحب اكل بزر بنص الشارع او سندويشة و انا مستعجلة بركض بدي ألحق الباص!

عندي كم صاحبة بس مش اكتر.. يعني انا انتقائية بكل شي لحد معين ، بس مستعدة أشاركك كل لحظة حلوة او حزينة اذا حبيتك من قلبي .. بس اذا خذلتني اكتر من مرة ما برجع أتعرف عليك و ببطل أفهم شو يعني فُرصة ، يعني بمسحك تماماً ، ما بنسى العِشرة إلا اذا إنتا بعتها ، صريحة و واضحة بس ما بجرحك بالحكي ولا بالفعل ، ما بوثق بسرعة بالناس أو بالأحرى ما بوثق إلا بحالي .. بس ما بعزل حالي عن الناس لأنهم جزء مهم بحياتي ، أنا مو مُستقرة.. بقلب من فترة لفترة و ما بضل بمكاني ، ممكن أنا ملولة شوي و بكره التِكرار.. بحب الإختلاف و فضولية كتير ، مش كتير بَحكي، بس لما تِحكيني بسمعك منيح و بَحس بالحرف .. ما ببين مشاعري بس لما تفيض ما في شي بوقفها .. أحياناً متمردة ..بس بتراجع عن الغلط و بعتذر من قلبي لما ما اكون صح ، بس بنفس الوقت ما بسكت عن حق إلي .. يعني أنا إنسانة سهل كتير تتعامل معي بس اذا فهمت جوهري .. ما بعتمد عالحكي و بحب الفعل اكتر، بحب العتمة كتير و بحب صوت الساعة بعنيلي اشي.. نسيت احكي كمان إني بحب النوم كتير ،بس مش اي نومة، بحب النومة اللي بتنسيني الدنيا وكل شي، يعني زي ما تحكي نومة شبه الغيبوبة.. أحيانا كسولة كتير زي دب الباندا بس لما تجيني الطاقة بتبطل تعرف تمسكني فجأة بتلاقيني عبارة عن ملاهي و اشياء متحركة، احياناً بصير احكي كتير لدرجة بتتمنى انو يصيبني اكتئاب و ابطل احكي ! . بحب أضحك حتى لو بدون سبب.. عادي بحكي مع حالي كتير و حتى بحكي لحالي نكتة و انا ماشية للمطبخ ، ما بحب الجديّة بس وقت الجد عندي جد.. اذا نجرحت و تعبت من كل شي حوليّ بصير أصعب إنسانة ممكن تتعامل معها و ممكن ما تشوفني لأشهُر ..

بحب ربنا كتير و ما بعرف أعيش يومي قبل ما أصلّي.. بدعي من قلبي و ببكي بالسجود :") .. ❤

يعني هيك.. بسأل دايماً حالي .. في حدا متلي ؟ .. يجيب معو قطعو المكسرة والمشتتة و انا نفس الشي، و نلملم شتات بعض ؟ .. حدا يجيب حالو متل ما هو بنقصه واجيب حالي بنقصي و نكمل بعض ؟ممكن نكون لوحة وحدة من لونين ؟ ممكن تفرجيني جروحك و افرجيك جروحي و بعدها نصير دوا لبعض؟ ممكن تكشفلي الجانب المظلم فيك و اكشفلك جانبي المظلم و نحط فيه لبعض نجوم و يصير مجرّة ؟ .. في حدا يعيش معي اشي متل هيك ؟ .. ️

هاد اشي بسيط عني ، يعني باختصار فيك تحكي عني ملاك و شيطان.. و تقسمني نُصّين " أبيض و أسود" .. و كل لون بوقته حلو ، يعني أنا خيالية شوي اكتر ، و بكره الواقع لأنو مُمل بس أكيد ما بنسى أعيش فيه، "ولنا في الخيالِ حياة" ..❤

و صح، اذا حبيت تعرف عبارتي المُفضلّة :" ثُمَّ إن يدي لا تُلوى، و قلبي لا يُهان، وأنا لا أسقط."️

-مثلاً، أنا هيك بحسنآتي و سيئاتي ، يعني .. أنا ميس .. :") !



   نشر في 24 نونبر 2017 .

التعليقات


لطرح إستفساراتكم و إقتراحاتكم و متابعة الجديد ... !

مقالات شيقة ننصح بقراءتها !



مقالات مرتبطة بنفس القسم

















عدم إظهارها مجدداً

منصة مقال كلاود هي المكان الأفضل لكتابة مقالات في مختلف المجالات بطريقة جديدة كليا و بالمجان.

 الإحصائيات

تخول منصة مقال كلاود للكاتب الحصول على جميع الإحصائيات المتعلقة بمقاله بالإضافة إلى مصادر الزيارات .

 الكتاب

تخول لك المنصة تنقيح أفكارك و تطويرأسلوبك من خلال مناقشة كتاباتك مع أفضل الكُتاب و تقييم مقالك.

 بيئة العمل

يمكنك كتابة مقالك من مختلف الأجهزة سواء المحمولة أو المكتبية من خلال محرر المنصة

   

مسجل

إذا كنت مسجل يمكنك الدخول من هنا

غير مسجل

يمكنك البدء بكتابة مقالك الأول

لتبق مطلعا على الجديد تابعنا