العقل البشرى - مقال كلاود
 إدعم  المنصة   
makalcloud
تسجيل الدخول

العقل البشرى

قدراته وحدوده

  نشر في 07 أكتوبر 2014 .

الحمد لله وحده والصلاة والسلام على من لا نبى بعده أما بعد ، فقد جائتنى أسئلة كثيرة حول موضوعات فكرية عديدة سبب التخبط الأساسى فيها كان عدم معرفة الحدود الفعلية للعقل البشرى وعلاقة تلك الحدود بالشريعة من جهة وبالحالة الانسانية العامة من جهة أخرى .. لذلك قررت أن اكتب ذلك المقال ضمن سلسلة مقالات فكر لتكون مرجعاً لمن أشكل عليه شئ فى التفكير وكذلك وضعتها ضمن بند الالحاد حيث أن سبب الحاد أشخاص كثيرة ممن عرفتهم كان تعظيمهم عقولهم أكثر مما يجب .. وبسم الله نبدأ

ماهو العقل ؟

العقل هو مجموع العمليات المخية المتعلقة بالمنطق .. والتعلق بالمنطق دا اما سلبى او ايجابى ، وعشان الناس اللى انا حاسس انها تنحت وهى بتقرا .. التعلق الايجابى بالمنطق يعنى لما نفكر بعقلنا بصورة نمطية منطقية (1+1= 2) زى لما بنحسب ونجمع او بنحل امتحان او بنفكر فى مشروع او بنخطط لأى حاجة معتادة .. والتعلق السلبى بالمنطق هو لما نفكر بصورة غير نمطية ، خارج الصندوق ، الابداع ، التفكير الابتكارى .. يعنى (1+1 =3) زى مثلاً لو معانا كمبيوتر ومعانا تليفون عادى دمجناهم مع بعض طلع لنا Smart phone .. لو معانا كمبيوتر كبير وواخد حجم ومساحة ، شيلنا منه الكيسه وصغرنا القطع وهكذا طلع لنا lap top وهكذا ، ركب حاجتين مع بعض وطلع حاجة جديدة ، صغر حاجة كبيرة ، كبر حاجة صغيرة ، قطع حاجة اجزاء .. الخ الخ .. يبقى كدا المخ بيعمل نوعين من العمليات (منطقية ولا منطقية) والعمليات دى كلها اسمها العقل ..

ما هى حدود العقل البشرى ؟

أول سؤال انا متوقعه كتعليق ع الفقرة دى هو ذلكم السؤال الرخم جداً اللى بيقول " مين حط الحدود دى ؟ " هرد عليك ببساطة دى فلسفتى فى قصة العقل اقراها الأول وبعد كدا انت حر فى رأيك .. المنطق بيقول ان كل انسان حبيس واقعه ، وهنا اقصد الواقع بالكامل مش مجرد الشارع اللى انت عايش فيه ، بس لو يعنى حضرتك اتولدت فى قرية فى صعيد مصر فى بيت فقير معندكمش تلفزيون ولا فاضى تتفرج عليه عشان مطحون شغل ليل نهار ، لو فجأة كدا لقيت نفسك فى دبى هتحس ان فى حاجة غلط .. مش دى الحياة اللى كنت تعرفها (هنا حدود فكرتك عن الدنيا هى البقرة والأرض ودوار العمدة والبيت ابو سقف خشب) .. فى حين ان ممكن حد تانى فى نفس القرية بس مركب دش يكون عنده وجهة نظر تانية لانه شاف مثلاً ناشونال جيو وبيسمع برامجها عن الحياة الطبيعية فاخد فكرة عن الكوكب بالكامل والكواكب المجاورة وكدا .. يبقى ايه هى حدود عقلك ؟ هى ما تستطيع ان تصل اليه من خلال خبراتك فى الحياة والخبرات هى نتاج استعمال الحواس السمع والبصر والشم واللمس والتذوق ، أوالمشى والترحال ، أو الناس اللى قعدت معاهم واتعلمت منهم ..

ايه توقيع الكلام دا ؟

لما تلاقى حد شاغل مخه أوى بما وراء درب التبانة والكون والكون الموازى وعمال يفسر ويستفسر .. دا شئ جميل لكن لابد انك تعرفه ان لعقلك حدود طالما معرفتك قاصرة .. عاوز تفهم اكتر روح اطوع فى وكالة ناسا مثلاً .. لما تلاقى حد بيسأل عن الحكمة من التشريع الفلانى او العلانى .. بنقوله وجهة نظرنا مثلاً ان ربنا فرض الصوم على الأمة لانه بيحدث ظاهرة من التكافل الاجتماعى والاحساس بالفقراء وجوعهم والاحساس بالعزاب (عشان اللى عنده بنت اللى بتلبس فيزون يفتكر لما يشوف مراته فى رمضان ومش قادر يلمسها يفهم مشاعر الشاب اللى بيشوف بنته ومش قادر يلمسها) الحاجات دى بتدفع الناس الى التقوى والخير والبر والاحسان .. يطلع بعد كل الكلام دا يقول لا الحكم دى مش كفاية وانا محتاج حكم تانية !! .. يا سيدى احنا بنقول وجهة نظرنا فى المسألة لكن فى النهاية السبب الأساسى فى اننا بنصوم هو اننا مؤمنين بربنا وربنا فرض علينا الصيام فبنطيع الأمر والحكم مجرد اجتهادات ..

الشطحات الفكرية للملاحدة

السبب الأساسى فى الحاد ناس كتير أعرفهم هو انهم حكموا عقلهم فى حاجات خارج نطاق معلوماته ومنطقه .. فبدأ يحاكم الحكمة من الخلق ومن توسع الكون ومن الملائكة ومن الجن وبالتالى اغلبهم موصولوش لحاجة مفيدة والسبب واضح ان دا خارج نطاق معلوماتهم وعقلهم فوصلوا الى نتيجة ان دا كله وهم وان مفيش اله فألحدوا .. يا جماعة ركزوا شوية فى الحاجات المتاحة قدامكم هل ينفع يكون كل ما نراه من جبال وانهار ومخلوقات (ضمن اطار معلومات عقلنا) من صنع بشر او طبيعة او صدفة !! السؤال دا أكبر سؤال فعلى يدعوا الى الايمان .. المنطق ينفى ذلك لانك لو استخدمت منطق القياس هتفهم انك لما بتشوف بيت اوضة وصالة بتقول على صاحبه غلبان انما لما تشوف قصر بتقول صاحبه ملك .. تخيل كل الابداع اللى فى الكون دا مين هيكون صاحبه !! ..

الشطحات الفكرية للمسلمين

النقطة دى ناس كتير هتعترض عليها لكنها فعلاً موجودة للأسف ، خلاصتها اننا كتير بنلغى عقلنا قدام مسائل فقهية بسبب ان الامام (الفلانى) قال رأيه فيها .. هل الامام دا معصوم ؟ هل كلامه لا يحتمل الخطأ والصواب ؟ .. وعلى الجانب الآخر من المشكلة تلقى شاب ميعرفش حاجة عن الفقه او اصول الفقه او الاجتهاد عموماً وبيقول أراء عجيبة بلا دليل او بأدلة منقوصة او لا حجة فيها .. تلاقى شخص بيقول ان الدين يجب ان نأخذ فيه بالأحوط .. مين قال الكلمة دى !! فين الدليل عليها ؟ .. شخص تانى بيقول اننا مينفعش نأخذ بالرأى الأسهل ، طيب ليه ؟ .. المعلوم من الفقه الاسلامى ان " المختلف فيه لا يعذب الله فيه ولا انكار فيه " .. يعنى ايه لا يعذب الله فيه يعنى ربنا لن يعذبنى ان أخذت برأى أحمد بن حنبل لانه أسهل الأراء .. ولن يعاقب أحمد بن حنبل ان اجتهد فى مسألة واصدر حكماً سهلاً فيها ييسر على الناس ولو كان الحكم خطأ لكن باجتهاد صحيح (يعنى على الاصول والقواعد المعروفة) .. ولا انكار فيه يعنى انا لا الغى الرأى الآخر وان جاز لى أن أبين ضعفه وقلة حجته وأن انتصر لرأيى بلا تعصب .. طيب ازاى هختار الرأى الفقهى ؟ اختار أكثر الأراء اقناعاً لك بأدلته وحجته وهذا الذى انت مطالب بالأخذ به .. يعنى لا تتبع رأياً لكثرة من يأخذون به ولا تنكر على رأى لمجرد انك سمعت شيخ من المشايخ ينكر علي أصحابه ، لان دى فتوى من الشيخ نفسه وتعتبر رأى هى كمان ممكن غيره ينكر عليه فيها .. وعلى ذكر الاقتناع بالرأى الفقهى احب اوضح حقيقة قوية جداً ان عدم الاقتناع هو سبب نفور الكثير من الناس عن الدين .. ان الفقهاء المتأخرين كان أغلبهم لا يوضح للناس مقصد الحكم او غايته ودا أحدث كارثة كبرى اسمها انعدام الفكر الاسلامى .. وهو دا السبب الحقيقى فى تراجع الناس عن الاحتكام للشريعة الاسلامية لانهم لا يعلمون عنها شيئاً الا قشورها او الخلاصة .. والناس تحتاج أن تفهم لتؤمن ..

ما بين الهلامية والجمود

انا واحد من الناس كنت بعانى من هلامية موضوعات كتيرة بتقابلنى وجمود موضوعات أخرى .. يعنى مثلاً من الهلاميات انك تقول لحد اختار عروسة ذات دين وخلق .. طيب يعنى ايه حدود الدين او الاخلاق اختار على اساس ايه ؟ ومن الجمود انك تلاقى واحد واقف على حكم فقهى من 500 سنة ممكن يتغير بتغير الزمان ومش راضى يغيره ومصر عليه .. يا سيدى الفقهاء الكبار كالشافعى غيروا أرائهم بعد فترة قصيرة مع اختلاف الظروف ، وكان الحل اللى انا شايفه صحيح للكلام دا هو حاجتين ؛ مع الهلامية وضع الحدود (ودا واضح فى كتابتى عن طريقة اختيار شريك الحياة فى سلسلة أسرة ) بصورة نقط واللى يجتازها ينجح وفيها نسبة مئوية واضحة مش بالكيلو .. ومع الجمود الحل الوحيد هو الغاء كل الثوابت المخترعة .. يعنى انا لا يثبت عندى الا (قال الله ، قال رسول الله - صلى الله عليه وآله سلم -) وكل ما عدا ذلك يمكن الأخذ منه والرد ، ولو كان اللى قال الرأى دا هو الائمة الأربعة أو فلان الفلانى اكبر مشائخ عصره .. لى عقل وله عقل أجتهد فى الدليل الذى اجتهد فيه ولكن بعد أن استجمع كل العلوم التى علمها هو (لغة وحديث واصول وتفسير الخ) عشان ميكونش اجتهادى قاصر عن الفهم الدقيق والصحيح للنصوص .. ودا الصحيح والمفروض ان كل شخص مثقف ينظر فى كتب الشريعة ويتمرس ويتدرب حتى يستخرج الأراء التى يثق هو بها .. فالرأى دين .

الى هنا ينتهى هذا المقال على عجالة لان الناس مبتحبش تقرا كتير وعشان ميزهقوش وكدا يعنى .. لو عندك استفسار او تعليق اكتبه فى الكومنتس ، ولو عجبك المقال اضغط لايك وشير وتويت وبلاس ، والسلام عليكم ورحمة الله وبركاته


  • 1

   نشر في 07 أكتوبر 2014 .

التعليقات


لطرح إستفساراتكم و إقتراحاتكم و متابعة الجديد ... !

مقالات شيقة ننصح بقراءتها !



مقالات مرتبطة بنفس القسم

















عدم إظهارها مجدداً

منصة مقال كلاود هي المكان الأفضل لكتابة مقالات في مختلف المجالات بطريقة جديدة كليا و بالمجان.

 الإحصائيات

تخول منصة مقال كلاود للكاتب الحصول على جميع الإحصائيات المتعلقة بمقاله بالإضافة إلى مصادر الزيارات .

 الكتاب

تخول لك المنصة تنقيح أفكارك و تطويرأسلوبك من خلال مناقشة كتاباتك مع أفضل الكُتاب و تقييم مقالك.

 بيئة العمل

يمكنك كتابة مقالك من مختلف الأجهزة سواء المحمولة أو المكتبية من خلال محرر المنصة

   

مسجل

إذا كنت مسجل يمكنك الدخول من هنا

غير مسجل

يمكنك البدء بكتابة مقالك الأول

لتبق مطلعا على الجديد تابعنا