كأنه النهاردة... - مقال كلاود
 إدعم  المنصة   
makalcloud
تسجيل الدخول

كأنه النهاردة...

كل واحد جواه تجربة قتلاه، مش عارف يقوم منها، كل واحد جواه قطع ازاز هتعور اي حد يقربلها، كل واحد جواه وجع لو قعد يصرخ من هنا لـ 100 سنة صوته مش هيروح، كل واحد جواه تجارب محدش يعرفها وتفاصيل مينفعش تتحكي فرفقاً بهم.

  نشر في 21 مارس 2021  وآخر تعديل بتاريخ 21 مارس 2021 .




طول الوقت كنت بتنازل وبقول خلي المركب تمشي،  طول الوقت بعدي وأفوت وده ضد طبيعتي، طول الوقت بقول يااااااه بكرة أكيد هيهدى ويعدي.

بس الحقيقة أن بكرة ده مبيجيش، بكرة ده أصلاً مشوفتش شمسه، بكرة ياااه طلع بعيد أوووي عن النهاردة.

أول ما أتعرفت عليه كان شخص مهذب سلس مرن عارف ربنا بيصلي وبيصوم مبيدخنش، كان فيه كل الصفات اللي أنا عايزاها، كان فيه كل حاجة أنا كنت كتباها بالورقة والقلم، زي ما بتقولوا كده على المقاس بالظبط.

الحقيقة أني كنت فاكرة أن الجواز بيتقاس كده، بيتقاس بالورقة والقلم والشكل الاجتماعي، يعني كنت فاكرة أن النسب بيبقى بأسماء العائلات عمري ما فكرت في موضوع أختلاف الشخصيات ده خالص.

اليوم اللي أتخطبتله فيه كان أسعد يوم في حياتي، يوم ولا في الاحلام عاملي فيه كل المفاجأت اللي ممكن حد يتخيلها، مكنش يوم عادي كان يوم أحداث سعيدة وجميلة.

وفترة الخطوبة نفسها كنت حقيقي محظوظة فيها جداً، ظهرت أختلافات كتيرة، ظهرت مشاكل كتيرة، وظهر معاها ضعف شخصيته، ظهرت معاها أن الأمان بيختفي، ظهر معاها أني طول الوقت كنت بشوف النهاية جاية.

ظهر معاها العند والكدب والخيانة والتكبر، ظهر معاها اني مبقاش ليا رأي في حاجة وأني ديكور زي اللي بيتجاب في البيت.

ظهر معاها الندية وهدم الذات، أسوء حاجة في الأرتباط أنك تهد اللي قدامك ومتساعدوش أنه يقوم، أسوء حاجة في الشريك السيء أنه يحسسك أنك ملكش لازمة.

في المقابل كان بيتعامل معايا على اني أميرة هدايا كتير، مفاجات كتير، بس كل ده مكنش بيقيمني، هستفاد ايه من كل الهدايا وانا في الاثاث وجهة زي الحاجات اللي في الشقة.

تجربة صعبة أليمة، مشاكل لو أتحكت تتعمل روايات، أنا مش خايفة غير من بكرة بس، خايفة أتعلق بحد ويطلع زي اللي قبله.

أصعب أحساس يكسرك أنك تتخان، حقيقي الجرح ده طعمه وحش أوي، وبستغرب من أي حد يفكر يجربه تاني، بستغرب من أي حد يفكر يعيشه تانين حقيقي أنا الأحساس ده بالنسبة لي أشبه بالأنتحار.

تخيل تخيل تبقى مأمن لحد وواثق فيه - بس المقابل انه يخون ثقتك يخون وعده يخنس بكلمته!

‎او اقولك تخيل انك تكتشف انك بتشوف شخص تاني غير اللي انت كنت شايفه!!!

‎مش كل الغلطات بتبقى وليدة اللحظة ومش كل الازمات بتبقى لسه حاصلة هو بتبقى عبارة عن بازل لما بيتجمع يا بتزعل يا بتبتسم!

صدمتك مش في المواقف، صدمتك يمكن في الكلام اللي مكنتش متخيله، صدمتك في الفعل اللي مكنتش متوقعه، صدمتك انه داسلك على جرح قديم من غير ما يعرف، صدمتك انك اكتشفت انك حقيقي قصاده من غير تقدير، يمكن صدمتك انك اتخضيت، هو ده الشخص اللي انا وثقت فيه؟، بتقعد تسأل نفسك طيب ليه؟، طيب هما هيكدبوا ليه!، طيب ازاي ؟، وتيجي تتكلم عنك هو انت وحش؟، هو انت تستاهل ده؟ هو انت فعلاً عبيط كده؟.



   نشر في 21 مارس 2021  وآخر تعديل بتاريخ 21 مارس 2021 .

التعليقات


لطرح إستفساراتكم و إقتراحاتكم و متابعة الجديد ... !

مقالات شيقة ننصح بقراءتها !



مقالات مرتبطة بنفس القسم













عدم إظهارها مجدداً

منصة مقال كلاود هي المكان الأفضل لكتابة مقالات في مختلف المجالات بطريقة جديدة كليا و بالمجان.

 الإحصائيات

تخول منصة مقال كلاود للكاتب الحصول على جميع الإحصائيات المتعلقة بمقاله بالإضافة إلى مصادر الزيارات .

 الكتاب

تخول لك المنصة تنقيح أفكارك و تطويرأسلوبك من خلال مناقشة كتاباتك مع أفضل الكُتاب و تقييم مقالك.

 بيئة العمل

يمكنك كتابة مقالك من مختلف الأجهزة سواء المحمولة أو المكتبية من خلال محرر المنصة

   

مسجل

إذا كنت مسجل يمكنك الدخول من هنا

غير مسجل

يمكنك البدء بكتابة مقالك الأول

لتبق مطلعا على الجديد تابعنا